NBA í nótt: Þrettán sigrar í röð hjá Boston

Þrír leikir voru í NBA-deildinni í körfubolta í nótt. Boston vann sinn þrettánda leik í röð með því að leggja Washington örugglega á útivelli 122-88.

Paul Pierce og Ray Allen skoruðu 22 stig hvor fyrir Boston en Caron Butler var stigahæstur hjá Washington með 19 stig.

Dallas sigraði Charlotte 95-90. Jason Terry var stigahæstur hjá Dallas með 26 stig og Dirk Nowitzki skoraði 23. Hjá Charlotte var Emeka Okafor stigahæstur með 27 stig.

Þá vann Utah sigur á Portland 97-88. Mehmet Okur átti stórleik fyrir Utah og skoraði 27 stig og tók 10 fráköst. Brandon Roy var stigahæstur hjá Portland með 33 stig.