Rivers framlengir við Boston

Doc Rivers, þjálfari NBA meistara Boston Celtics, hefur samþykkt að framlengja samning sinn við félagið. Sagt er að samningurinn gildi út leiktíðina 2010-11 og bæti því tveimur árum við núgildandi samning hans.

Undir stjórn Rivers náði Boston besta árangri allra liða í deildinni á síðustu leiktíð þar sem liðið vann 66 leiki og tapaði aðeins 16. Liðið vann síðar meistaratitilinn eftir úrslitaeinvígi við LA Lakers í júní sl.

Rivers er að hefja sína fimmtu leiktíð með Boston eftir að hafa verið þjálfari Orlando Magic í fimm ár þar á undan, en hann var kjörinn þjálfari ársins um aldamótin þegar hann var á sínu fyrsta ári með Magic.