Hommabrandari Phil Jackson veldur fjaðrafoki

Phil Jackson, þjálfari LA Lakers, var kallaður inn á teppi af NBA deildinni í kvöld eftir ummæli sem hann lét falla eftir að hans menn voru teknir í bakaríið síðustu nótt.

Jackson var ósáttur við hversu illa hans mönnum gekk að verjast gegnumbrotum leikmanna San Antonio og hafði þetta að segja þegar hann var spurður út í gegnumbrotin.

"Þetta var svona "Brokeback Mountain-leikur" hjá okkur, því þeir voru að smjúga allt of mikið inn í vörnina hjá okkur," sagði Jackson og vitnaði óskarsverðlaunamyndina frá árinu 2005 sem fjallar um samband samkynhneigðra karlmanna í villta vestrinu.

"Þessi ummæli voru mjög ósmekkleg og við höfum fengið loforð frá félaginu (Lakers) um að svona lagað verði ekki endurtekið í framtíðinni," sagði talsmaður NBA deildarinnar.

Talsmaður samkynhneigðra var heldur ekki hrifinn af ummælum Jackson. "Phil Jackson er búinn að þjálfa nógu lengi til að geta tjáð sig um lið sitt án þess að vera með ódýra hommabrandara."