British Airways og umhverfið

Íslendingar hafa tekið British Airways opnum örmum síðan félagið hóf reglulegt áætlunarflug milli London og Keflavíkur fyrir rúmu ári síðan. Flugrekstur er ein þeirra atvinnugreina í heiminum, sem áhrif hefur á hitastig jarðar. Umræðan um umhverfismál fer sívaxandi um allan heim og vitund almennings og forráðamanna fyrirtækja um mikilvægi ábyrgari umgengni við náttúruna sömuleiðis. Langar félagið því að gera hér örlitla grein fyrir stefnu sinni, árangri og stöðu í umhverfismálum.

Síðastliðin sjö ár hefur British Airways lagt höfuðáherslu á að viðskipti með kolefniskvóta sé árangursríkasta leiðin til að draga úr útblæstri koltvísýrings í flugiðnaðinum í heiminum. Hefur flugfélagið verið í fararbroddi flugfélaga um allan heim að því er varðar áherslu á þetta fyrirkomulag og í raun eina flugfélagið sem tekið hefur þátt í mótun tillagna og stefnu í þessum efnum. Árangur þeirrar vinnu er meðal annars grundvöllur laga á vegum Evrópusambandsins um viðskipti með kolefniskvóta sem taka eiga gildi árið 2011. British Airways hefði kosið að lögin tækju gildi enn þá fyrr.

British Airways leitar ávallt leiða til að draga úr umhverfisáhrifum starfsemi sinnar. Sjást þess víða merki, svo sem í vali á nýjum og umhverfismildari þotum og búnaði, bifreiðum og tækjum sem starfsemin þarfnast um allan heim auk orkunotkunar í vinnurýmum svo fátt eitt sé nefnt. Sem dæmi má nefna að eldsneytisnýting flugflota British Airways hefur aukist um 27 prósent frá árinu 1990. Einnig má nefna að hin nýja flugstöð 5 á Heathrowflugvelli við London, sem félagið fær afhenta í september næstkomandi, ber skýr merki umhverfisáherslna í fjárfestingum.

British Airways var fyrsta flugfélag heims til að bjóða viðskiptavinum sínum að kolefnisjafna ferðalag sitt með félaginu og eru uppi áform um að gera þá þjónustu við viðskiptavinina enn þægilegri en nú er þannig að fleiri kjósi að taka þátt. Í þessu sambandi má nefna að þær nýju þotur, sem félagið tekur í notkun á næstu árum, hafa í för með sér á bilinu 17-30 prósent minni útblástur koltvísýrings á hvern farþega í samanburði við núverandi flugflota.

British Airways er meðal stofnaðila að Sustainable Aviation Group, samtaka flugfélaga og geimfyrirtækja. Samtökin hafa sett sér það markmið að draga úr útblæstri koltvísýrings á hvern farþega um helming á næstu 20 árum. Einnig styrkir British Airways rannsóknir á sviði eldsneytisrannsókna og hefur jafnframt staðið fyrir verklegum tilraunum sem miða m.a. að því að auka eldsneytisnýtingu og draga úr útblæstri. Þá tekur British Airways þátt í rannsóknum ESB, háskóla og flugvélaframleiðenda á áhrifum efri laga lofthjúps jarðar á flugvélar, en markmið þeirra er að auka skilning á þeim lögmálum sem þar ríkja til frekari þróunar flugvéla.

British Airways leggur mjög hart að framkvæmdastjórn Evrópusambandsins að finna leiðir til að straumlínulaga flugumferðarstjórn í því skyni að auka hagræði og draga úr útblæstri í Evrópu. Talið er að þær leiðir sem ræddar hafa verið geti dregið úr útblæstri um 12 prósent.

Þess misskilnings hefur gætt í umræðunni að flugstarfsemin í heiminum sé stærsti einstaki áhrifavaldur aukins hita í lofthjúpi jarðar. Staðreyndin er á hinn bóginn sú að áhrifin eru fremur lítil þegar heildarmyndin er skoðuð. Má nefna að umferð um vegi framleiðir sex sinnum meira magn gróðurhúsalofttegunda og heildarorkuframleiðsla heims sextán sinnum meira magn. Samkvæmt Sternskýrslunni svokölluðu (sjá „The Stern Report“ á vefnum), sem hagfræðingurinn Nicholas Stern kynnti fyrir breskum stjórnvöldum seint á síðasta ári, er flugiðnaðurinn ábyrgur fyrir um 1,6% af heildarframleiðslu gróðurhúsalofttegunda. Segir jafnframt að enda þótt iðnaðurinn legði ekkert að mörkum til að draga úr útblæstri muni hlutdeild flugrekstrarins í heildarframleiðslu gróðurhúsalofttegunda ekki verða meiri en sem nemur 5% árið 2050. Er þá tillit tekið til fyrirsjáanlegs vaxtar í greininni og hliðaráhrifa, sem honum tengjast.

British Airways er eitt stærsta flugfélag heims og flytur árlega rúmar 33 milljónir farþega til um 140 áfangastaða í áttatíu löndum. Meginstarfsstöð flugfélagsins er á stærsta flugvelli heims, Heathrow við London. Þrátt fyrir að einstök áhrif flugrekstrar í heiminum á aukinn hita í andrúmsloftinu sé ekki mikil í heild tekur British Airways baráttuna gegn auknum gróðurhúsalofttegundum og fyrir mikilvægi aukinnar umhverfisverndar alvarlega og leggur sín lóð á vogarskálarnar í þeim efnum. Frekari upplýsingar um stefnu British Airways í umhverfismálum er að finna á vefsetri þess, ba.com.

Upplýsingafulltrúi British Airways á Íslandi.