Japanska netfyrirtækið Livedoor ætlar að selja fjármálaarm fyrirtækisins fyrir 17,6 milljarða jena eða 10,6 milljarða krónur til fjárfestingafélagsins Advantage Partners. Þessi hluti fyrirtækisins hefur fram til þessa verið peningamaskína Livedoor en þaðan koma um 80 prósent af tekjum fyrirtækisins.
Greiningaraðilar í Japan segja þetta marka endalok fyrirtækisins í þekktustu mynd þess.
Í janúar á þessu ári var lokað fyrir viðskipti með hlutabréf í kauphöllinni í Tókýó í 20 mínútur vegna mikils álags á tölvukerfi kauphallarinnar þegar fjöldi fjárfesta seldi bréf sín í Livedoor eftir að upp komst að yfirvöld í Japan hefðu fyrirtækið til rannsóknar.
Við rannsóknina kom í ljós að fjórir stjórnendur fyrirtækisins fölsuðu afkomutölur Livedoor árið 2004 og létu sem það hefði skilað hagnaði í stað taps. Voru þeir handteknir nokkru síðar. Umskipti hafa orðið á stjórn félagsins, sem var afskráð úr kauphöllinni í mars. Þá er enn réttað yfir Takafumi Horie, stofnanda og fyrrum forstjóra Livedoor, vegna málsins. Hann hefur haldið fram sakleysi sínu.
Breska ríkisútvarpið segir Livedoor ætla framvegis að einbeita sér að vefhönnun og hugbúnaðarþróun.
