Erlend lán í heimabönkum

Viðskiptavinum Frjálsa fjárfestingabankans hefur frá síðustu mánaðamótum staðið til boða að greiða af erlendum lánum í gegnum heimabanka eða með greiðsluseðlum, sem eru sendir heim. Fram til þessa hefur einungis verið hægt að greiða af erlendum lánum með millifærslum inn á reikning bankans í kjölfar bréflegrar tilkynningar um að komið sé að gjalddaga.

Í tilkynningu frá bankanum segir Kristinn Bjarnason, framkvæmdastjóri Frjálsa fjárfestingabankans, að viðskiptavinir bankans geti sparað sér umtalsverðar upphæðir með því að setja erlend lán hjá bankanum í beingreiðslur í sínum viðskiptabanka eða sparisjóði. Þannig lækki innheimtugjald fyrir hvern gjalddaga í 160 krónur. Þannig sparist rúmlega 8.000 krónur á ári.

Þá hefur Frjálsi fjárfestingabankinn lágmarkað aukakostnað sem oft fylgir lánveitingum. Til dæmis sé ekkert gjald tekið fyrir umsjón með þinglýsingu eða fyrir uppgjör og afléttingu lána frá öðrum lánastofnunum. Ekkert afgreiðslugjald er tekið fyrir þessa umsýslu. Þá setur bankinn engin skilyrði um önnur bankaviðskipti, að því er fram kemur í tilkynningunni.

Í tilkynningunni segir ennfremur að erlend lán séu í eðli sínu óverðtryggð. Hins vegar geti myntirnar sem lánið er tekið í tekið breytingum í samræmi við sveiflur gjaldmiðla gagnvart íslensku krónunni. Lánin eru uppgreiðanleg án gjalds á lánstíma ef lántaki sýnist svo að gengisþróun verði honum óhagstæð. Kristinn segir þá sem taki lán sem þessi meðvitaða um gengisáhættuna og sveiflur krónunnar. Til lengri tíma litið skipti sveiflurnar minna máli. „Vaxtakostnaður á erlendum lánum er í dag lágur í samanburði við vexti á íslensku krónunni og síðan má velja sér myntkörfur sem hafa sýnt sig að vera nokkuð stöðugar til lengri tíma litið," segir Kristinn í tilkynningunni.