Beckham vill að númer sjö verði hengt upp

Það verða sérstakar minningarathafnir um George Best á Old Trafford í vikunni, bæði á bikarleiknum annað kvöld og fyrir næsta deildarleik liðsins á laugardaginn. David Beckham er með sérstaka hugmynd um hvað gera skuli við númerið sem Best bar á treyju sinni forðum.

"Mér finnst að ætti að hengja treyju númer sjö upp og hætta að nota hana framvegis á Old Trafford til að heiðra George Best," sagði Beckham, en Best lék í treyju númer 7, eins og reyndar Beckham sjálfur á sínum tíma.

"Það hafa verið frábærir leikmenn hjá Manchester United sem hafa verið númer sjö, George Best, Bryan Robson og svo Eric Cantona, svo að það var mikill heiður fyrir mig að fá að klæðast treyju númer sjö á sínum tíma," sagði Beckham.