Southgate hefur náð sér af meiðslunum

Gareth Southgate, fyrirliði Middlesbrough, hefur náð sér af nárameiðslum sem hafa haldið honum frá keppni síðan í endaðan október og verður væntanlega í liði Boro sem mætir Fulham á sunnudag.

"Ég er byrjaður að æfa á fullu aftur, eftir að hafa stundað hlaup í landsleikjafríinu og ég vonast til að verða klár á sunnudaginn," sagði Southgate. Búist var við að Southgate gæti misst úr allt að níu leiki vegna meiðslanna, en hinn 35 ára gamli varnarmaður virðist nú vera klár eftir aðeins fjögurra leikja fjarveru.

"Ég vil auðvitað spila alla leiki sem völ er á, en ég verð að gæta þess í framtíðinni að spila ekki leiki eins og þennan gegn West Ham í október þegar ég meiddist. Maður verður stundum að hafa vit fyrir sér," sagði Southgate.