Við getum endurtekið sigurgönguna

Eiður Smári Guðjohnsen segir að keppinautum Chelsea í ensku úrvalsdeildinni beri að vara sig, því meistararnir séu fullfærir um að endurtaka 40 leikja taplausa hrinu sína í deildinni.

"Ekki láta það koma ykkur á óvart þó við endurtökum leikinn og verðum taplausir í næstu 40 leikjum," sagði Eiður. "Það er mikil festa og sigurvilji í liðinu og það er ekkert að óttast. Við erum ekki lið sem lætur það viðgangast að tapa leikjum. Við áttum að vísu ekkert gott skilið úr leiknum við Betis á dögunum, en eins og allir sáu vorum við mikið betri gegn Manchester United," sagði Eiður Smári.