Ferguson vissi af Vieira

Sir Alex Ferguson, knattspyrnustjóri Manchester United, hefur nú viðurkennt að hann hafi vitað að Patrick Vieira væri falur eftir lok síðustu leiktíðar með Arsenal, en sagðist hafa ákveðið að gera ekki tilboð í hann af nokkrum ástæðum. "Það er ekkert leyndarmál að ég hef lengi verið á höttunum eftir miðjumanni til að leysa Roy Keane af hólmi þegar hann hættir og ég býst við að Patrick hefði verið einn af fáum mönnum sem gætu valdið því. Við vorum hinsvegar búnir að spyrjast fyrir um hann tvisvar áður og fengum þá þvert nei, svo að ég var ekkert að reyna að eltast frekar við hann. Ég er líka ekkert viss um að Arsenal hefði viljað selja erkifjendum sínum fyrirliða sinn," sagði Ferguson í viðtali við tímarit Manchester United.