Ís­lendingar spiluðu stór hlut­verk í leikjum dagsins á Bret­lands­eyjum

Andri Lucas Guðjohnsen var í byrjunarliði Blackburn Rovers þegar liðið tók á móti QPR í ensku B-deildinni í dag. Markalaust var í hálfleik en snemma í fyrri hálfleik skallaði Andri Lucas boltanum á Ryoya Morishita sem lagði hann snyrtilega í markið.

Forskot Blackburn entist ekki lengi og jafnaði QPR nánast í næstu sókn. Á 74. mínútu náði QPR forystu leiksins með skalla frá Jimmy Dunne sem endaði á því að verða sigurmark leiksins.

Þetta var fyrsta tap tímabilsins hjá Blackburn en liðið er í tíunda sæti ensku B-deildarinnar með fjögur stig þegar þrjár umferðir eru búnar.

Nýtti mínúturnar vel

Benóný Breki Andrésson byrjaði á bekknum þegar Stockport County tók á móti Wycombe Wanderers í ensku C-deildinni. Stockport County spilaði vel og var liðið að vinna 4-1 þegar Benóný Breki var settur inn á völlinn á 80. mínútu.

Hann er ekki enn búinn að byrja leik á þessu tímabili en hann nýtti mínúturnar í dag vel og gaf sína fyrstu stoðsendingu tímabilsins.

Situr í öðru sæti deildarinnar

Tómas Bent Magnússon var í byrjunarliði Hearts þegar liðið tók á móti St. Johnstone í skosku úrvalsdeildinni. Hearts náði forystu snemma á níundu mínútu leiksins og bætti liðið við öðru marki 30 mínútum síðar.

Í seinni hálfleik náði Ruari Paton að minnka muninn fyrir St. Johnstone en liðið náði ekki að jafna leikinn.

Leikurinn endaði því með 2-1 sigri Hearts sem er í öðru sæti skosku úrvalsdeildarinnar þegar þrjár umferðir eru búnar. Celtic er á toppi deildarinnar með fullt hús stiga.