Wenger fær peninga í janúar

Arsene Wenger, knattspyrnustjóri Arsenal, mun njóta góðs af góðri afkomu Arsenal þegar leikmannakaupaglugginn opnast á ný í janúar ef marka má orð Keith Edelman, stjórnarmanns Arsenal. "Félagið verður auðvitað að halda að sér höndunum vegna byggingar nýja leikvangsins, en Arsene Wenger mun þó hafa úr einhverju fé að moða í janúar," sagði Edelman. "Hann er þó ekki knattspyrnustjóri sem stekkur til og fer að spreða peningum út í loftið ef hann fær tíu milljónir í hendurnar, heldur kaupir hann eingöngu leikmenn sem hann telur geta styrkt liðið. Það er gott að vera með knattspyrnustjóra eins og Wenger, sem hefur næmt auga fyrir hæfileikum og er ekki endilega að leitast við að hlaupa til og kaupa rándýra leikmenn," sagði Edelman.