Blaðamannafundur vegna Símans

Framkvæmdanefnd um einkavæðingu hefur boðað til blaðamannafundar klukkan 16 í dag í Þjóðmenningarhúsinu við Hverfisgötu. Fundarefnið er fyrirkomulag sölu á hlut ríkisins í Landssímanum. Samkvæmt heimildum fréttastofu Stöðvar 2 og Bylgjunnar hefur náðst samkomulag á milli stjórnarflokkanna um hvernig standa skuli að sölu Símans, þ.e. að selja hann einum kjölfjárfesti, en salan verði samt sem áður háð ákveðnum skilyrðum. Þetta mun vera samkvæmt ráðgjöf Morgans Stanley.