Síminn seldur þremur fjárfestum

Síminn verður seldur í einu lagi en að lágmarki til þriggja fjárfesta. Um þetta hafa formenn stjórnarflokkanna náð samkomulagi samkvæmt heimildum Morgunblaðsins. Segir þar að samkomulagið feli það í sér að hver hópur tilboðsgjafa verði að vera samansettur af þremur viðskiptahópum eða einstaklingum og má enginn þeirra eiga meira en 40-45 prósenta hlut. Búist hafði verið við að fyrirkomulag sölunnar yrði tilkynnt fyrir páska en það náðist ekki í þessarri viku. Nú er búist við að samkomulag byggt á störfum einkavæðinganefndar verði kynnt í ríkisstjórn strax eftir helgi. Talað hefur verið um það á markaði að lagt hafi verið upp með það frá upphafi að Síminn yrði seldur breiðum hópi fjárfesta báðum stjórnarflokkunum hugnanlegum. Áhugasamir fjárfestar bíða óþreyjufullir eftir ákvörðun ríkisstjórnarinnar.