Candela leitar nýs félags

Franski varnarmaðurinn Vincent Candela hjá Roma virðist vera á leið frá félaginu ef marka má orð umboðsmans hans, Alexander Kristic. Hinn 31 árs gamli Candela hefur verið hjá Roma síðan hann kom frá franska liðinu Guingamp árið 1997, en hefur lítið fengið að spila eftir að Luigi Del Neri tók við liðinu af Rudi Völler fyrr á tímabilinu. Candela, sem er vinstri bakvörður, vann Scudetto, ítalska meistaratitilinn, árið 2001 með Roma ásamt því að verða heimsmeistari 1998 og Evrópumeistari 2000 með franska landsliðinu. Umboðsmaður Candela sagði hinsvegar í samtali við skysports í dag að skjólstæðingur sinn sé að líta í kringum sig eftir nýju liði þegar samningur hans við Roma rennur út í sumar. "Það hafa nokkur lið haft samband við okkur," sagði Kristic. "Það er áhugi hjá Bolton en ekkert alvarlegt ennþá. Vincent mun verða samningslaus í sumar og hann langar að skipta um umhverfi eftir níu ár hjá Roma. Hann á nokkur góð ár eftir og langar að hafa gaman af knattspyrnu og hann mun ekki eiga í vandræðum með að spila á Englandi."