Freyr fái fólk til að trúa: „Eitt­hvað mjög sér­stakt að gerast hérna“

Freyr tók við Rosenborg þegar liðið var í fallsæti en með sjö sigrum í fyrstu níu leikjunum undir hans stjórn í norsku úrvalsdeildinni blasir barátta um Evrópusæti nú við. Besta byrjun hjá þjálfara Rosenborg síðan árið 2010.

Staðan í deildinni hefur ekki aðeins batnað. Stemingin í Þrándheimi gagnvart Rosenborg hefur snarbreyst. Mikil aukning hefur verið á áhorfendafjölda á heimaleikjum Rosenborg á hinum sögufræga Lerkendal leikvangi. Trúin er komin aftur hjá stuðningsmönnum liðsins. Liðið og umgjörðin í kringum það hefur tekið nokkur stig upp á við í gæðum eftir komu Íslendingsins.

„Maður sér það bara að öllu leyti, fyrst og fremst bara hvernig við spilum,“ segir Alfreð Finnbogason, yfirmaður knattspyrnumála hjá Rosenborg í samtali við Vísi. „Það passar vel inn í það hver strategían hjá Rosenborg er og passar vel við það hvað stuðningsmenn vilja sjá. Ég held að eitt af fyrstu markmiðunum sem við settum okkur þegar Freyr kemur inn er að spila fótbolta sem stuðningsmenn vilja sjá. Að fá fólk aftur á völlinn. Við erum komin aftur upp í 17-18 þúsund áhorfendur á hverjum heimaleikleik sem er gríðarlega stórt. Fá fólkið aftur með okkur í lið. Það er eitthvað sem var gríðarlega mikilvægur faktor þegar við vorum í þessu ferli að ráða þjálfara á sínum tíma.“

Það hafi verið forgangsmál á sínum tíma í miðjum stormi hjá Rosenborg að fá inn þjálfara sem næði til fólks, fengi það til að vinna saman sem ein heild.

„Það er einn af styrkleikum Freys að gera það og fullt hrós á hann fyrir að hafa náð að endurvekja bæinn. Maður fær þau skilaboð úr öllum áttum frá fólki sem var búið að missa aðeins trúna en telur nú að þetta sé hægt. Vonin er komin aftur í bæinn, fólk er byrjað að trúa og ég hef klárlega þá tilfinningu að það sé eitthvað mjög sérstakt að gerast hérna.“

Eitthvað sem þú lærir ekki í skóla

Freyr virðist ná því fullkomna jafnvægi að geta verið alvarlegur í sínu starfi, harður stjóri, en einnig náð að sjá léttu hliðina hjá því fólki sem hann starfar með.

„Það er náttúrulega bara það sem ég fann fyrir sem leikmaður undir stjórn Freys, bæði hjá landsliðinu og hjá Lyngby. Þessir leiðtogahæfileikar sem hann hefur. Það er eitthvað sem þú getur ekkert lært um í bók eða skóla. Að hafa tilfinningu fyrir fólki, hvað þessi ákveðni hópur þarf akkúrat núna. Þetta er snúið verkefni. Þú ert í 25 manna hóp og þarft einhvern veginn að halda öllum ánægðum og vera sanngjarn við alla en samt setja kröfur.

Ég held að þetta sé klárlega mjög spennandi verkefni fyrir hann líka. Að taka þátt í því að rífa upp þennan gamla risa og koma honum á þann stað sem hann á heima á. Freyr var náttúrulega hjá Brann sem er annar stór klúbbur en kannski ekki með sömu sögu og Rosenborg. Freyr veit allavega mjög vel hvað hann er að fara út í og hvernig á að tækla það, það hefur sýnt sig hingað til.“