Hafnar því að hafa bolað sér inn á sjúkra­stofu

„Ég hringdi einu sinni í konuna hans hvernig hann hefði það og hvort að hann gæti tekið á móti gestum. Ég upplifi þetta ekki í neinu samhengi sem þarna kemur fram.“

Þetta sagði Inga Sæland í kvöldfréttum RÚV um yfirlýsingar Guðmundar Inga Kristinssonar, fyrrverandi ráðherra flokksins. Þau deila um það hvort hún hafi farið fram á að hann segði af sér ráðherraembætti eða það hafi verið hans eigin ákvörðun. „Það var ég sem skipaði hann í þetta embætti og það var hann sem sagði því af sér. Það er líka staðreynd.“ Hún hafnar því að hafa gert honum að hætta sem ráðherra.

„Það er ekkert um sannleika að ræða, það er bara um upplifun. Ég er ekki að upplifa þessa hluti eins og Guðmundur Ingi Kristinsson gerir, engan veginn. Ég er bara ofsalega leið og sár yfir þessari framgöngu hans á þessum tímapunkti,“ sagði hún í kvöldfréttum RÚV. 

Inga segir afsögn Guðmundar úr flokknum sem hann tilkynnti í apríl hafa komið sér í opna skjöldu. „Hann upplifir hlutina öðruvísi en ég og hann nálgast hlutina öðruvísi en ég.“ Það sé ljóst að hann sé ósáttur við að gegna ekki lengur ráðherrastöðu. Hún sakni Guðmundar og vilji sjá hann aftur bera á sér merki Flokks fólksins.

Guðmundur hefur greint frá því að Inga hafi verið ágeng á meðan hann jafnaði sig á sjúkrahúsi eftir hjartaaðgerð í desember. Hún hafi krafist þess að komast inn á sjúkrastofu hans til að segja honum að hann þyrfti að hætta sem ráðherra. Það gerði Guðmundur tólf dögum síðar og tilkynnti svo afsögn úr flokknum í apríl. Inga tók svo við af honum sem mennta- og barnamálaráðherra. 

Viljað komast inn á sjúkrastofuna á þriðja degi jóla

Guðmundur segir að samtal Ingu við eiginkonu hans hafi orðið þess valdandi að hann ákvað að yfirgefa Flokk fólksins.

„Það var samtal um að hún vildi koma inn á sjúkrastofuna og hitta mig vegna þess að henni fannst ég hafa verið allt of lengi frá, níu daga og þetta gengi ekki upp. Ég yrði bara að hætta sem ráðherra,“ segir Guðmundur í samtali við RÚV. 

Þetta hafi verið á þriðja degi jóla í fyrra og konan hans hafi neitað því að hleypa Ingu inn á sjúkrastofuna. Erindið mætti bíða þar til hann hefði verið útskrifaður. 

Kvaðst sjálfur hafa tekið ákvörðun um afsögn

Guðmundur veitti takmarkaðar skýringar á afsögn sinni úr flokknum þegar greint var frá henni í apríl og vísaði í ótilgreindan persónulegan trúnaðarbrest sem varðaði persónuleg samskipti innan flokksins. Þegar hann tilkynnti brotthvarf úr ráðherrastól þann 8. janúar gaf hann til kynna að það hefði verið hans ákvörðun. 

„Að vandlega ígrunduðu máli hef ég ákveðið að segja af mér embætti mennta- og barnamálaráðherra vegna veikinda. Eins og fram hefur komið gekkst ég undir opna hjartaaðgerð fyrir jól og fram undan er nú bataferli,“ sagði Guðmundur í yfirlýsingu á þeim tíma.  

Inga Sæland hefur ekki gefið Vísi kost á viðtali í dag.  

Fréttin er í vinnslu.