Færri tengifarþegar en fleiri komu til Ís­lands

Icelandair flutti 577 þúsund farþega í ágúst, fimm prósentum færri en í sama mánuði í fyrra.

Farþegum sem komu til Íslands fjölgaði hins vegar um ellefu prósent og voru þeir tæplega 269 þúsund. Farþegum frá Íslandi fjölgaði um tólf prósent en tengifarþegum fækkaði um 27 prósent og voru 186 þúsund.

Bogi Nils Bogason, forstjóri Icelandair, segir breytinguna skýrast af því að félagið hafi lagt meiri áherslu á þá markaði þar sem eftirspurnin var sterkust.

„Við erum að nýta sveigjanleika leiðakerfisins okkar og setja áhersluna á þá markaði sem voru sterkastir. Það var náttúrulega mikil eftirspurn til Íslands í tengslum við sólmyrkvann,“ segir Bogi.

Félagið hafi því lagt meiri áherslu á ferðir til Íslands en minni áherslu á tengiflug milli Evrópu og Norður-Ameríku.

Meðaltekjur Icelandair af farþegum, að teknu tilliti til vegalengdar, jukust um 24 prósent frá ágúst í fyrra. Sætanýting var tæp 86 prósent og minnkaði um 1,3 prósentustig. Framboð á flugsætum dróst saman um fimm prósent.

Ekki að hætta flugi yfir hafið

Bogi segir fækkun tengifarþega ekki fela í sér að Icelandair ætli að hverfa frá flugi yfir Atlantshafið.

„Við erum ekki að hætta neinu. Við höldum áfram að þróa leiðakerfið með þessum hætti, en aðstæður breytast í okkar umhverfi og með okkar sveigjanlega og sterka leiðakerfi getum við breytt okkar áherslum,“ segir Bogi.

Verði markaðurinn fyrir tengiflug sterkari geti félagið aftur lagt meiri áherslu á hann.

Farþegum Icelandair hefur fjölgað um þrjú prósent það sem af er ári. Bogi segir eftirspurnina enn sterka á helstu mörkuðum félagsins en hátt eldsneytisverð geri flugrekstur krefjandi um þessar mundir.