Líkir mótinu við að spila í dýra­garði

Það vakti athygli í síðustu viku þegar mikil truflun var á leikjum á Opna bandaríska risamótinu í tennis. Til þess að vekja meiri athygli á íþróttinni bauð mótið áhrifavöldum að koma og vekja athygli á mótinu. Það endaði ekki vel þar sem áhrifavaldarnir enduðu á að trufla keppni og haga sér ekki eftir siðum tennisins.

Wimbledon er annað risamót en það er aðeins hefðbundnara en önnur risamót. Spilað er á grasvelli og keppendur mega einungis vera í hvítum fötum á meðan þeir spila. Með hefðbundna umhverfinu ætlar mótið ekki að bjóða áhrifavöldum á mótið og sömuleiðis verða hlutir eins og hringljós gerðir upptækir. Sterk ljós og myndatökur uppi í stúkum geta virkilega truflað leikmennina.

Stórar stjörnur eins og Naomi Osaka og Coco Gauff hafa biðlað til stuðningsmanna að kynna sér siðina í tennis og hvernig maður á að haga sér sem áhorfandi.

Áhrifavaldar eru ekki eina málið á Opna bandaríska mótinu sem hefur vakið athygli heldur hefur sterk lykt af grasreykingum í kringum vellina einnig truflað leikmenn. Fólk er einnig að standa upp í miðju stigi sem getur virkilega truflað keppendur. Franski leikmaðurinn Adrian Mannarino lýsti því að spila á Opna bandaríska risamótinu væri eins og að spila „Í dýragarði“