„Þetta er erfiður dagur og ferlinu er ekki lokið“

Í skilaboðunum segir Hildur að skipulagsbreytingarnar séu umfangsmiklar og muni hafa áhrif á störf hjá borginni. Samkvæmt heimildum fréttastofu hafa breytingarnar verður tugum starfsmanna sagt upp, meðal annars innan velferðarsviðs og skóla- og frístundasviðs.

„Ég get staðfest að boðað var til aukafundar borgarráðs í morgun. Í kjölfarið er unnið að umfangsmiklum skipulagsbreytingum sem munu hafa áhrif á störf hjá borginni.“

„Þetta er erfiður dagur og ferlinu er ekki lokið. Við leggjum áherslu á að ræða fyrst við það starfsfólk sem breytingarnar snerta. Við munum senda út tilkynningu síðar í dag þegar við höfum upplýst starfsfólk okkar,“ skrifar Hildur í skilaboðum til fréttastofu nú rétt eftir hádegi.

Heimildir fréttastofu herma að skipulagsbreytingar tengist meðal annars svæðismiðstöðum borgarinnar en þær eru alls fjórar og á heimasíðu Reykjavíkurborgar kemur fram að þar sé meðal annars veittur stuðningur við börn, ungmenni, fjölskyldur, aldraða og fatlaða og að þar sameinist velferðarþjónusta og skóla- og frístundaþjónusta í nærumhverfi barna og ungmenna.

Rætt verður við Hildi Björnsdóttur borgarstjóra síðar í dag sem og aðra fulltrúa bæði meiri- og minnihluta borgarstjórnar.