Sigur­vegarinn hafði aldrei hlaupið hálft mara­þon áður

Tilton vann hálfa maraþonið í Reykjavík með nokkrum yfirburðum á tímanum 1:07:50 en hann var þremur mínútum á undan næsta manni, Davíð Frey Magnússyni, í mark en þess ber að geta að Davíð sló Íslandsmetið í sínum aldursflokki (18-19 ára).

„Já þetta var í fyrsta sinn. Planið er að byrja að hlaupa maraþon núna, þannig að þetta var góð byrjun á maraþonferlinum,“ sagði Tilton í viðtali við Birnu Maríu Másdóttur, sem stýrir beinni útsendingu frá Reykjavíkurmaraþoninu.

Hann sagði enga sérstaka ástæðu fyrir því að hann valdi Reykjavík fyrir sitt fyrsta hálfmaraþon.

„Ég og fjölskyldan mín vildum bara skemmta okkur, skoða nýjan stað og taka þátt í hlaupinu.“

Tilton er nýútskrifaður úr Ruckers háskóla en þar hljóp hann í 5000 metra og 10.000 metra hlaupi. Nú sagðist hann ætla að taka hlaupin skrefinu lengra og skella sér í maraþon.

„Núna þegar ég er útskrifaður er tímabært að taka þetta lengra,“ sagði Liam en hann ætlar líka að njóta íslensku nátturunnar meðan hann er hér á landi og skella sér í fjallgöngu. Hann vonast eftir betri veðri en var í dag.

„Já vonandi. Það var mikill vindur í dag, en þetta var ekkert svo slæmt.“