Þoka í Fær­eyjum veldur vand­ræðum

Lech Poznan átti að lenda í Færeyjum í gær en varð ekki erindi sem erfiði vegna þoku yfir Færeyjum, ómögulegt var að lenda í eyjunum. Færeyski blaðamaðurinn Tróndur Arge greinir frá því að Lech hafi verið ráðlagt að koma degi fyrr, til að sleppa við óútreiknanlegar aðstæður til flugs og lendinga í Færeyjum.

Önnur tilraun var gerð til að lenda í Færeyjum í morgun en það gekk litlu betur. Flugvél með lið Lech sneri við og lenti í Björgvin í Noregi áður en ákvörðun um næstu skref verður tekin.

Vera má að fresta þurfi leiknum sökum þessa og alls óvíst hvort þokuskilyrði batni eftir því sem líður á daginn.

Leikurinn á að hefjast klukkan 17:30 í dag en eins og sakir standa er ekki útlit fyrir að það takist að sparka leiknum af stað á þeim tíma.

Lech Poznan leiðir einvígi liðanna 1-0 eftir fyrri leikinn í Póllandi.