Fór á fyllerí og missti fyrirliðastöðuna

Ástralía sló í gegn á Samveldisleikunum í ár og vann metfjölda gullverðlauna, heil 37.

Isaac Cooper var einn af þeim sem vann gullverðlaun en þegar hann hafði lokið keppni og átti að mæta í höllina til að styðja liðsfélaga sína á lokadegi mótsins var hann hvergi sjáanlegur.

Cooper sást á sumbli í Glasgow á sama tíma og hafði einnig sést fá sér í glas á hóteli liðsins fyrr um daginn, samkvæmt Sydney Morning Herald.

„Isaac Cooper mætti ekki á lokakvöld sundkeppninnar eða á lokafund liðsins í Glasgow, þvert á væntingar liðsfélaga hans,“ segir í yfirlýsingu frá sundsambandi Ástralíu.

„Isaac hefur síðan sjálfviljugur sagt sig úr fyrirliðahópi liðsins,“ segir einnig í yfirlýsingunni.

Cooper hafði áður lýst yfir miklu stolti við að fá fyrirliðastöðuna, sérstaklega í ljósi þess að hann missti af síðustu Samveldisleikum. Þá var hann sendur heim fyrir að hafa misnotað lyf, sem hann sagðist ekki hafa tekið til að auka hæfi hans í sundi heldur vegna andlegra örðugleika.