Níu handteknir vegna vopnalagabrots á Akureyri

Eiður Þór Árnason og Agnar Már Másson skrifa 2. ágúst 2026 09:01

Mikill fjöldi var á Akureyrarvelli í gærkvöld. Vísir/Viktor Freyr

Níu voru handteknir og einn þeirra vistaður í fangageymslu vegna vopnalagabrots á tónleikasvæði á Akureyrarvelli í gærkvöld. Fjórir voru handteknir í bænum vegna minniháttar fíkniefnalagabrots og einn þeirra vistaður í fangageymslu. Einnig var tilkynnt um stórfellda líkamsárás þar sem einstaklingur endaði með beinbrot í andliti.

Mikill erill er sagður hafa verið hjá lögreglunni á Norðurlandi eystra síðastliðinn sólarhring en fjöldi fólks er á Akureyri þar sem bæjarhátíðin Ein með öllu fer fram um verslunarmannahelgina.

Vopnalagabrotið er til rannsóknar en samkvæmt upplýsingum frá varðstjóra á Akureyri var einungis um eitt eggvopn að ræða.

„Í aðgerðinni sjálfri eru níu alls handteknir. Einn af þeim er svo tekinn í frekari skoðun og endar á því að við þurfum að vista hann vegna málsins. Hinum átta var bara sleppt á staðnum,“ segir Andri Freyr Sveinsson varðstjóri.

Lögregla hafi fengið upplýsingar sem sneru að ákveðnum hópi sem metnar hafi verið áreiðanlegar.

„Við höfðum þarna vitneskju um að það væri hugsanlegt eggvopn í þessum hópi. Í gærkvöldi er gríðarlegur fjöldi fólks kominn saman á fjölskylduhátíð og þá voru aðstæður þannig að við ákváðum að fara í aðgerðir til að sannreyna þessar upplýsingar og þessi rannsókn leiddi til þess að það fannst eggvopn á einum þeirra sem er svo handtekinn vegna málsins.“

Líkamsárás á Akureyri en engin mál á Siglufirði

Ein stórfelld líkamsárás sem tilkynnt var undir morgun er til rannsóknar hjá lögregluembættinu. Enginn hefur verið handtekinn vegna hennar en brotaþoli var fluttur á sjúkrahús.

„Þar kom í ljós að hann var með beinbrot í andliti og var með höfuðáverka eftir slagsmál.“

„Þegar lögreglan kemur á vettvang er gerandi farinn. Niðurstaðan var sú að við vorum ekki með upplýsingar um geranda þannig að það er eitthvað sem að rannsóknardeild embættisins þarf að skoða.“

Tveir í fangageymslu vegna ölvunar á almannafæri

Þá komu upp átta mál vegna ölvunar eða vímuástands og gistu tveir í fangageymslu.

Í fimm tilvikum voru afskipti höfð af börnum vegna ástands. Tíu umferðarlagabrot eru skráð hjá embættinu síðastliðinn sólarhring en ekkert tilfelli kom upp þar sem grunur var um akstur undir áhrifum vímugjafa.

Engin mál eru skráð hjá lögreglunni á Siglufirði þar sem bæjarhátíðin Síldarævintýrið á Siglufirði fer fram. Alls voru skráð 83 mál hjá lögreglunni á Norðurlandi eystra síðastliðinn sólarhring.

Fréttin er í vinnslu.

Mest lesið

Fleiri fréttir