Fagnaði sigri með því að kyssa ljós­myndarann

Williamson er að koma til baka eftir erfið hnémeiðsli en vann gull í bæði 50 og 100 metra bringusundi á leikunum.

Frábær árangur Williamson vakti líka athygli á ástarsambandi hans enda vakti hann sjálfur á því athygli með því að fagna sigri með því að kyssa einn ljósmyndarann.

Þetta var ekki hvaða ljósmyndari sem er heldur sænskur íþróttaljósmyndari sem er einnig kærasta hans.

Williamson kynntist hinni sænsku Linneu Lindberg þegar hann tók þátt í Ólympíuleikunum í París 2024.

„Ég átti ekki endilega þá Ólympíuleika sem ég ætlaði mér að eiga en í mínum augum er ég sigurvegari því ég kom heim með hana,“ sagði Sam Williamson í viðtali eftir sigurinn.

Um leið og Williamson kom fyrstur í mark í 100 metra bringusundi Samveldisleikanna þá hoppaði hann upp úr lauginni og hljóp beint að ljósmyndarahópnum og í fangið á kærustu sinni. Hann gaf henni einn góðan sigurkoss. Eftir það þekktu allir sögu þeirra.

Lindberg vinnur fyrir ástralska sundliðið á Samveldisleikunum.

„Þetta er ævintýri og eitthvað sem við tvö munum muna að eilífu. Ég held að hún sé með fleiri tár í augunum en ég í augnablikinu,“ sagði Williamson.

„Ef við fáum eina góða mynd frá því í kvöld, þá er það allt þess virði. Bara það að hafa hana á sundlaugarbakkanum sem og að hafa mömmu, pabba, systur mína í stúkunni, alla heima að horfa. Þetta er fyrir okkur öll. Ég elska ykkur öll,“ sagði Williamson.

Parið fagnaði sigrinum á Instagram með því að deila mynd sem Lindberg tók af Williamson og gullverðlaununum hans við sundlaugarbakkann.

Það má sjá myndir af þessu með því að fletta hér fyrir ofan og neðan.