Segir gríðar­legt á­lag á miðakaupendum í sumar

Umræðan meðal íbúa í Vestmannaeyjum er að það verði heldur fámennari Þjóðhátíð í ár heldur en áður. Framkvæmdastjóri Herjólfs segir óvenjulega marga miða eftir í ferjuna og fréttastofu hafa borist ábendingar um að það gangi almennt hægt og jafnvel brösuglega að leigja út íbúðir og hús miðað við undanfarin ár.

Einar Bárðason, framkvæmdastjóri SVEIT, samtaka fyrirtækja á veitingamarkaði, og viðburðahaldari með meiru, segir vangaveltur um aðsókn Þjóðhátíðar ekki óeðlilegar en segir framboð á tónlistarviðburðum í sumar hafa verið óvenju mikið en hann var til viðtals í Reykjavík síðdegis í gær. 

Í byrjun sumars hafi gríðarlegt magn miða á tónlistarhátíðir selst. Rúmlega fjörutíu þúsund miðar hafi selst á fyrstu fjórum eða fimm vikum sumars, „sem er gríðarlegt magn af bæði athygli og náttúrulega peningum.“

„En ég myndi fara varlega í það að lýsa yfir andláti Þjóðhátíðar. Hún er ótrúlega seig og hefur staðið ýmislegt af sér þessi hundraðþrjátíu og eitthvað ár sem hún er búin að vera í boði.“

Bergmál hafi kostað fólk bæði peninga og athygli

Einar segir Bergmál á Þingvöllum hafa verið fyrirferðarmikið verkefni sem „fékk gríðarlega mikla athygli og sópaði til sín á síðustu metrunum allt að tuttugu þúsund miðakaupendum, svona miðað við fréttaflutning allavega. Það er gríðarlegt magn af miðum sem fer þar út. Það eru bara Ed Sheeran og Justinarnir [Bieber og Timberlake] kannski sem hafa tekið jafn mikið af miðum til sín.“ Fólk hafi þurft að huga að samgöngum, bílastæðum og aðgengi á Þingvöllum sem hafi kostað fólk bæði peninga og athygli.

Hann telur því ekki óeðlilegt að gestir séu tvístígandi með miðakaup á Þjóðhátíð miðað við „atið og álagið á miðakaupendum.“

Sömuleiðis séu Lopapeysan, tónlistarhátíð Írskra daga á Akranesi, Kótilettan á Selfossi og Ein með öllu á Akureyri stórar hátíðir sem hafi tekið mikið til sín. Þar áður hafi Bubbi Morthens verið með tvenna afmælistónleika í Laugardalshöll, þar sem tólf þúsund miðar hafi selst, og Herra Hnetusmjör með fjölskyldu- og stórtónleika í Höllinni. Einnig hafi selst upp á tvenna tónleika Stefáns Hilmarssonar í Hörpu.

„Fólkið sem er á hreyfingu og tekur þátt í þátt í lífi og fjöri er kannski komið að þolmörkum. En svo getur vel verið að íslenska hagfræðin og ákvörðunartakan taki við og menn segi: Tökum eitt í viðbót.“

Spurning hvort fólk haldi norður eða til Eyja

Útborgunardagur sé enn ein breytan í ákvörðunum landsmanna um ferðalög verslunarmannahelgarinnar en helgin sé frekar snemma á ferðinni þetta árið. Einar segir að kúnnahópur hátíða helgarinnar „lifi árið af á þremur útborgunardögum“ en föstudagurinn teygi sig inn í júlí og 1. ágúst lendi á laugardegi sem gæti haft áhrif á miðasölu. 

Mánudaginn fyrir verslunarmannahelgi kallar Einar „súper-mánudag“ en þá verði ákveðinn vendipunktur í miðasölu. „Þá mun skemmtanaþyrst fólk opna langtímaveðurspána, kíkja á stöðuna á bankabókinni og taka ákvörðunina,“ segir Einar í Facebook-færslu. 

Áhugavert verði að sjá hvort tónleikagestir ákveði að fara til Eyja eða norður á Akureyri.  „Gamlir fastagestir á þjóðhátíð“, FM95BLÖ, troða upp á hátíðinni Ein með öllu á Akureyri sömu helgi og Einar segir tónleikana því skapa ákveðna samkeppni. 

Rigning og dumbungur á suðvesturhorninu síðustu vikur hafi áhrif en fólk sé ekkert sérlega spennt fyrir því að skella sér á útihátíð eða í útilegu og veðrið á Þjóðhátíð síðustu tvö árin sé heldur ekki hvatning. 

„Ég held að miðakaupendur séu núna að fatta að það eru tvær vikur í verslunarmannahelgi. Þeir eru að velta fyrir sér hvort þeir ætli að fara norður eða til Vestmannaeyja eða hvort þeir ætli bara yfirhöfuð að gera eitthvað allt annað. Sú ákvörðun mun verða tekin í hádeginu mánudaginn 26. eða 27. júlí.“

„Ég er alveg sannfærður um að landinn fer af stað, það er bara spurning hvert.“