Í­búa­fjöldinn fimm­faldast í blíðunni

Reiknað er með að hiti á landinu verði frá ellefu stigum upp í 28 stig í dag. Líkur á hitameti fara hverfandi með deginum.

Teitur Arason, veðurfræðingur hjá Veðurstofu Íslands, segir þráláta hæð yfir Bretlandi og nokkuð lágan þrýsting með suðausturströnd Grænlands útskýra veðurfarið hér á landi.

„Þessi hæð við Bretland, hún hefur beint til okkar mjög hlýjum loftmassa úr suðri og suðvestri, beint honum yfir landið en þetta loft er mjög rakt líka, þannig að áveðurs hefur verið vætusamt með köflum og skýjað.“

Vindur mælist 13 til 20 metrar á sekúndu víða á norðvesturhluta landsins og gætu hviður náð allt að 30 metrum á sekúndu. Teitur segir því varasamt að vera á ferðinni á stórum ökutækjum.

„Þetta eru svona vindstrengir sem eru varasamir, sérstaklega fyrir þessi farartæki sem eru á ferðinni á sumrin sem eru viðkvæm fyrir vindum. Hann er mestur þarna í norðvesturfjórðungi landsins. Þar eru vindstrengir verstir í dag og þess vegna gáfum við út gular viðvaranir.“

Vonarglæta á föstudag

Mikill hiti ræður ríkjum á Austurlandi um þessar mundir en von er á háum skýjabakka þar eftir hádegi.

„Þessi tvö atriði, að sólin minnkar og hlýjasta loftið er að fara hjá, dregur úr líkunum á að íslandsmet í hita falli. Það telst ólíklegt þó að það sé smávegis möguleiki á því.“

Hann segir örlitla vonarglætu vera til staðar fyrir borgarbúa á föstudaginn en að öðru leyti sé ekki reiknað með betri tíð í bráð.

„Austanvert landið verður áfram í mjög góðu veðri og þessi suðvestanátt og hæðin virðast ætla að halda velli um helgina og í byrjun næstu viku. Íbúar við vesturströndina geta huggað sig við að það er möguleiki á að birti upp dagpart á föstudaginn. En að öðru leyti næstu daga verður áfram skýjað og þar með talið á höfuðborgarsvæðinu. Það er vonarglæta á föstudaginn en annars því miður lítil von á næstunni.“

Bongóblíða og iðandi mannlíf á Seyðisfirði

Hitinn á Seyðisfirði mældist 25 gráður í nótt. Benedikta Guðrún Svavarsdóttir, framkvæmdastjóri Haföldunnar, þar í bæ ræddi við fréttastofu þegar hiti þar hafði náð um 28 gráðum en hún segir bæinn iða af lífi.

„Þetta er sannkallað bongó eins og við köllum það. Orðið bongóblíða var einmitt fundið upp á Seyðisfirði. Ég er svona farin að fá símtöl frá vinum með FOMO-ið sem eru farnir að boða komu sína og spyrja hvort það sé eitthvað laust og hægt að halla. Svo er náttúrulega bara skemmtiferðaskipatraffík og iðandi mannlíf, það eru tvö hérna í höfninni á Seyðisfirði í dag.“

Og er íbúafjöldinn búinn að þrefaldast við það?

„Ég held að hann sé alveg að fimmfaldast með öllum hinum ferðamönnunum.“