„Þetta mun breyta öllu fyrir okkur“

Stefán Árni Pálsson leit við á Akureyri og ræddi við framkvæmdastjóra KA, Sævar Pétursson, um uppbygginguna sem er að eiga sér stað á KA svæðinu. Innslagið úr Sportpakka Sýnar má sjá í spilaranum hér fyrir neðan.

„Þetta mun breyta öllu fyrir okkur, öllum rekstrinum eins og við þekkjum KA í dag. Við höfum verið að glíma við vandamál með búningsklefa og aðra aðstöðu. Hér erum við að fá flotta lyftingaraðstöðu, veitingasal til að taka á móti gestum og aðkomuliðum. Þetta verður ekkert sama félagið og hefur verið síðustu ár, þegar þetta verður klárt eftir nokkra mánuði,“ segir Sævar.

Mikið hefur líka verið hugsað um upplifun stuðningsmanna á KA-svæðinu.

„Þetta er hannað með það að leiðarljósi að þarna sé hægt að taka á móti gestum áður en þau koma á handbolta-, fótbolta- eða blakleik,“ segir Sævar.

Stúkan við fótboltavöllinn verður fyrst til að vera tekin í notkun, þegar KA tekur á móti nágrannaliði Þórs í Akureyrarslag þann 27. júlí næstkomandi. Stefnt er svo að því að mannvirkið verði fullklárað og afhent til KA í júlí á næsta ári, 2027.

Sýnt var frá nýja KA-svæðinu í Sportpakka Sýnar í gærkvöld. Innslagið má sjá í spilaranum að ofan.