Frank Aron Booker yfir­gefur Val og semur við Álfta­nes

Frank Aron Booker hefur skrifað undir samning við körfuknattleiksdeild Álftaness og mun leika með liðinu næstu tvö árin.

Booker kemur til Álftaness frá Val þar sem hann hefur leikið undanfarin ár við frábæran orðstír. Hann býr yfir víðtækri reynslu en hann hefur spilað í bandaríska háskólaboltanum, á meginlandi Evrópu og á að baki landsleiki fyrir Íslands hönd. Þá hefur hann unnið til fjölda titla hér á landi.

Á nýafstöðnu tímabili skilaði Booker 13,6 stigum og 6,4 fráköstum að meðaltali í leik auk þess að gefa 1,9 stoðsendingar, stela 1,14 boltum og setja niður 2,3 þrista í leik. Það er því ljóst að hér er á ferðinni gríðarlegur liðsstyrkur fyrir liðið hans Baldurs Þórs Ragnarssonar.

„Það er mikið fagnaðarefni að Booker sé mættur á Álftanes. Hann er gríðarlega öflugur leikmaður og ekki síður frábær karakter. Hann er mikill sigurvegari og hans eiginleikar munu passa vel við það sem við erum að byggja upp hérna,” sagði Baldur Þór Ragnarsson í frétt á miðlum Álftaness.