„Nýi skólinn“ og Norður­landa­blæti í Bil­bao

Tryggvi skrifaði á dögunum undir nýjan samning við Bilbao sem gildir til ársins 2029. Bóndasonurinn úr Bárðardal hefur spilað á Spáni síðustu níu ár og síðustu ár verið lykilmaður hjá Bilbao, sem í vor varð Evrópubikarmeistari annað árið í röð.

„Þetta er búið að vera mjög skemmtilegt ár fyrir mig, bæði í körfuboltanum og utan hans, og það var ótrúlega gaman að gera þetta aftur með svona skemmtilegum hópi af leikmönnum. Ótrúlega skemmtilegur andi sem myndaðist hjá okkur.

Ég og Harald Frey, norski leikstjórnandinn okkar, erum á þriðja árinu okkar saman. Við teljum okkur hafa búið til þennan kúltúr sem hefur myndast í liðinu og ætlum að reyna að halda því. Það er ein af stóru ástæðunum fyrir því að við ákváðum báðir að semja við félagið og halda áfram í þrjú ár. Þetta er ótrúlega spennandi verkefni og ég hef fulla trú á þessu,“ segir Tryggvi.

Engin neikvæðni og öskur heldur bullandi jákvæðni

En hvernig er þessi skandinavíski kúltúr sem þeir Frey hafa átt stóran þátt í að móta hjá Bilbao?

„Það er alltaf smá Norðurlandablæti í sumum klúbbum. Bilbao er búið að vera með mikið af Svíum og síðan Íslending og Norðmann. Það er fyndið hvernig það er búið að vera. En ég hef fulla trú á þessu og hvernig þeir eru að gera þetta.

Þetta er svolítið nýi skólinn. Ekki gamli skólinn þar sem er verið að öskra, hamast og einhver neikvæðni oft. Við reynum að hafa bullandi jákvæðni, halda áfram að gera vel og hafa trú hver á öðrum.“

Tryggvi spilar með Íslandi gegn Ítalíu í Laugardalshöll á fimmtudagskvöld, og við Bretland í Manchester á sunnudaginn. Ísland hefur þegar unnið Ítalíu einu sinni í undankeppninni, og Litháen einu sinni, og dugar því einn sigur í viðbót til að komast upp úr riðlinum og á lokastig undankeppninnar. Þangað taka liðin með sér fyrri úrslit og því myndi Ísland með sigri á Ítölum taka risastökk í átt að HM.

„Þetta er lið sem passar svolítið vel á móti okkur og leikmenn sem við höfum spilað núna við margoft. Amedeo Tessitori er stóri maðurinn þeirra, sem ég er í mestum slagsmálum við, og þetta er eiginlega orðið óþolandi því við erum alltaf að spila við hvorn annan. En það er bara gaman og við höfum haft nokkuð góða stjórn á Ítölum til þessa og teljum okkur geta spilað vel á móti þeim. Ef við gerum okkar hluti þá getum við tekið þennan leik heima,“ segir Tryggvi en viðtalið við hann má sjá í spilaranum.