„Hlægi­legt þvaður gegn lýð­ræði!“

Þetta segir Guðlaugur Þór í tengslum við frétt Vísis frá því fyrr í dag þar sem greint var frá því að Pawel Bartoszek þingmaður Viðreisnar hafi mátt þola holskeflu ómálefnalegra ummæla í tengslum við þjóðaratkvæðagreiðsluna. Guðlaugur hefur, líkt og Pawel, verið áberandi í umræðunni um komandi þjóðaratkvæðagreiðslu en þeir Pawel eru á öndverðum meiði.

„Ég er búinn að henda út svona hundrað Já-urum. Bara búinn að blokka þá sem segja að ég sé fífl og hálfviti og þiggi mútur. Það er varla einn ESB-sinni sem svarar efnislega,“ segir Guðlaugur Þór í samtali við Vísi.

Guðlýgur sem gerir ekki greinarmun á sannleika og lygi

Umræða um umræðuna hefur verið áberandi eftir tilkomu samfélagsmiðla. Þegar fólk skiptist á skoðunum eru fljótlega mættir menn sem vilja skipta sér af því að aðrir séu að skiptast á skoðunum og láta vita af því að þeim finnist umræðan heimskuleg og leiðinleg. Vissulega getur slík „meta-umræða“ farið í spíral en nú kveður rammt að þegar þjóðaratkvæðagreiðslan er annars vegar. Það er eins og stór hluti þjóðarinnar hafi beinlínis gengið af göflunum.

Að sögn Guðlaugs Þórs hafa allir þeir sem hafa lagt orð í belg, svo sem Diljá Mist Einarsdóttir þingmaður Sjálfstæðisflokksins og Konráð S. Guðjónsson hagfræðingur, fengið að kenna á þessum vanstilltu þátttakendum „umræðunnar“.

Vísir tók stikkprufu á síðu Guðlaugs og þrátt fyrir að hann sé búinn að hreinsa til hjá sér þurfti ekki að leita lengi eftir ummælum sem mega heita vafasöm.

Og hér er góður bútur. Athuga að þessi prufa er afar handahófskennd, þetta er holskefla.

„Eins og það er stórkostlegt að hafa samfélagsmiðla, að taka umræðuna og skiptast á skoðunum, þá er ekki hægt að eiga orðaskipti við fólk sem kallar þig öllum illum nöfnum og lýgur upp á þig. Ég mun áfram vera mjög virkur á samfélagsmiðlum en ég frábið mér það að Já-arnir séu upp til hópa málefnalegir en Nei-jarar ekki, það stenst enga skoðun.“

Enginn hagnist á þessum ofsa

Guðlaugur Þór segir ljóst að enginn hagnist á slíkum ofsa. „Við hljótum að geta haft skoðanaskipti um þessi og önnur mál án þess að ganga fram með þessum hætti. 

Ég var bara að tala við manneskju sem hefur ýmislegt málefnalegt og gagnlegt til málanna að leggja. Það væri styrkur ef hún væri meira áberandi í þjóðfélagsumræðunni. Hún sagði að ef maður færi þarna inn hellist viðbjóðurinn yfir mann.“

Guðlaugur Þór segir ljóst að þetta dragi úr þátttöku í umræðu sem sé mikilvæg.

„Það er jákvætt ef fólk er virkt í þjóðfélagsumræðu. Áður en samfélagsmiðlar komu til, ef fólk hefði tjáð sig með þeim hætti og það gerir nú, ættu menn ekki orð. Svona segir maður ekki um annað fólk. Þetta er kúltúr sem þjóðin mun ekki hagnast á.“