Taka upp gjald­skyldu við Smára­lind

Fréttamaður Sýnar kynnti sér málið í kvöldfréttum en þar kom meðal annars fram að gjaldskyldan muni bara taka gildi ef lagt er við Smáralind lengur en í fjóra klukkutíma.

Ekki nein áhrif á langflesta viðskiptavini

„Það hefur átt sér stað mikil uppbygging hérna á svæðinu í kringum Smáralind á síðustu árum og samtímis hefur aðsókn í húsið aukist alveg verulega og við höfum verið að finna fyrir auknum þrýstingi á bílastæðin hérna,“ segir Sandra Arnardóttir, markaðsstjóri Smáralindar, og bætir við að það sé sérstaklega mikill þrýstingur sem skapist af bílum sem eru lagðir við verslunarmiðstöðina til langs tíma.

„Þannig að til þess að tryggja það að okkar viðskiptavinir hafi greiðan aðgang að bílastæðunum og að húsinu, þá erum við að bregða til þessa ráðs,“ segir hún einnig og ítrekar að það verði áfram frítt að leggja við Smáralind í fjórar klukkustundir, „þannig að þetta mun eiginlega ekki hafa nein áhrif á langflesta okkar viðskiptavini“.

Innheimtar verða 450 krónur á klukkustund en líkt og þegar hefur komið fram verður bara rukkað fyrir þær mínútur sem telja umfram fjórar klukkustundir. Sandra segir heimsókn í verslanahöllina, þar sem gestir geta meðal annars farið að sjá bíómynd eða farið út að borða í mathöllinni, myndi alla jafna rúmast innan þessa fría tímabils.

„Það verður stuðst við bara alla nýjustu tækni í þessum málum, myndavélagreiningar og greiðslukerfi. Fólk getur í rauninni komið hérna og keyrt að og ef það er styttri en fjórar klukkustundir gerir það ekki neitt, bara keyrir í burtu og finnur ekkert fyrir þessu,“ segir hún en að það sé ekki búið að ákveða endanlega dagsetningu fyrir upphaf gjaldtöku.

„Það er ekki komin dagsetning á það, en þetta verður í haust,“ segir Sandra.