Wimbledon-meistari í fjögurra ára bann

Í desember 2025 mætti starfsmaður frá ITIA, sem sér um lyfjapróf og því tengdu í tennis, heim til Vondrousova. Hún hafði ekki leyft starfsmanninum að taka prófið og því var hún dæmd í fjögurra ára bann frá tennis. Þetta er stöðluð lengd á banni fyrir alla þá sem neita að taka lyfjapróf.

Vondrousova vann Wimbledon-mótið árið 2023 og náði að komast í sjötta sæti heimslistans í tennis. Hún hefur ekki nýtt rétt sinn til að kæra bannið ennþá en rök ITIA fyrir banninu er að hún hafi ekki komið með nógu góða ástæðu fyrir því að losna undan lyfjaprófi. Vondrousova sagði að starfsmaður ITIA greindi ekki frá því hver hann væri né hver tilgangur heimsóknarinnar væri.

Vondrousova er verulega ósátt við þessa niðurstöðu og í yfirlýsingu sem hún skrifar á Instagram segist hún aldrei hafa tekið ólögleg efni. Hún hafi oft farið í lyfjapróf eftir atvikið síðasta desember og þar hafi prófin alltaf verið neikvæð.

Framtíð hennar er óljós og er ekki vitað hvað framhaldið hjá henni ber í skauti sér. Þó að það sé ekki algengt að neita að fara í lyfjapróf hefur það gerst áður. Rússinn Vladislav Ivanov neitaði að fara í lyfjapróf árið 2024 og fékk einnig fjögurra ára bann.

Tennisheiminum er verulega brugðið við þessa niðurstöðu. Einhverjir eru ósáttir við að Vondrousova fékk bann án þess að ólögleg efni hafi verið mæld í henni. Jannik Sinner og Iga Swiatek voru bæði mæld með ólögleg efni í sér og fengu styttra bann. Sinner fékk bann í þrjá mánuði og Swiatek aðeins einn mánuð.