Strákarnir okkar stál­heppnir með riðil á HM

Ísland fékk Norður-Makedóníu úr næstefsta styrkleikaflokki, í stað til dæmis Frakklands eða Spánar, og svo einnig Japan og Barein í sinn riðil.

Ef þessi riðill hljómar kunnuglega þá má benda á að á HM 2019 var Ísland einmitt einnig með Norður-Makedóníu, Japan og Barein í riðli, en þá í sex liða riðli þar sem einnig voru Spánn og Króatía.

Dregið var í riðla í München í dag, í beinu streymi á Vísi, og hér að neðan má sjá riðlana.

Riðlarnir á HM í Þýskalandi 2027

A-riðill í München:

• Þýskaland
• Serbía
• Túnis
• Úrúgvæ

B-riðill í Stuttgart:

• Egyptaland
• Ítalía
• Grænhöfðaeyjar
• Sádi-Arabía

C-riðill í München:

• Króatía
• Spánn
• Síle
• Tyrkland

D-riðill í Stuttgart:

• Argentína
• Frakkland
• Brasilía
• Kúveit

E-riðill í Kiel:

• Svíþjóð
• Noregur
• Grikkland
• Katar

F-riðill í Magdeburg:

• Portúgal
• Færeyjar
• Pólland
• Alsír

G-riðill í Kiel:

• Danmörk
• Slóvenía
• Bandaríkin
• Angóla

H-riðill í Magdeburg:

• Ísland
• Norður-Makedónía
• Barein
• Japan

Gestgjafar HM, Þjóðverjar, höfðu þegar ákveðið að Ísland yrði í H-riðli sem spilaður verður í Magdeburg.

Ísland var í efsta styrkleikaflokki og gat því ekki fengið aðra þjóð úr þeim flokki í sinn riðil en fékk einn mótherja úr 2., 3. og 4. flokki.

Milliriðil með Dönum bíður

Þrjú af fjórum liðum úr H-riðlinum komast áfram í milliriðil og spila þar með þremur liðum úr G-riðli, í Hannover. Í þeim riðli eru meðal annars ríkjandi meistarar Danmerkur en einnig Slóvenía, Angóla og Bandaríkin.

Alls spila 32 lið á HM, í átta fjögurra liða riðlum. Þrjú lið fara áfram úr hverjum riðli og myndast þá fjórir sex liða milliriðlar. 

Úr hverjum milliriðli komast tvö lið áfram í 8-liða útsláttarkeppni sem öll fer fram í Lanxess Arena í Köln.