Donni lék Landin grátt en mátti þola sárt tap í fyrsta leik um titilinn

Donni raðaði inn mörkum framhjá markverðinum magnaða Niklas Landin en það var hins vegar Landin sem á endanum tryggði heimamönnum sigur, með því að verja vítakast frá Færeyingnum Jóhan Hansen á síðustu sekúndu.

Donni var markahæstur hjá SAH með sjö mörk úr átta tilraunum og liðið var grátlega nálægt því að vinna óvæntan sigur. Aalborg getur nú orðið meistari þegar liðin mætast á heimavelli SAH á fimmtudaginn en ef SAH vinnur mætast liðin í oddaleik.

SAH var 16-14 yfir í hálfleik en Juri Knorr skoraði fyrsta mark seinni hálfleiks og heimamenn voru fljótir að jafna metin. Þeir komust svo fjórum mörkum yfir en Donni og félagar neituðu að gefast upp, jöfnuðu metin á nýjan leik og komust í 29-28 þegar aðeins tvær og hálf mínúta voru eftir.

Aalborg skoraði hins vegar síðustu tvö mörkin, þar af sigurmarkið frá Mads Hoxer tuttugu sekúndum fyrir leikslok.

Þýska landsliðsstjarnan Knorr endaði markahæst hjá Aalborg með átta mörk úr tólf tilraunum en Hoxer skoraði sjö mörk úr ellefu tilraunum.