„Svaraðu spurningunni“

Nú þegar styttist í þjóðaratkvæðagreiðslu um aðildarviðræður við Evrópusambandið er farið að hitna í kolunum í Alþingishúsinu. Málið átti hug þingmanna í óundirbúnum fyrirspurnatíma á þinginu í morgun og þar sakaði Guðlaugur Þór Þórðarson, þingmaður Sjálfstæðisflokksins utanríkisráðherra um Evrópumet í mótsögnum.

Spurði hann ráðherrann hvort hefja ætti aðildarviðræður eða hvort það ætti að ljúka þeim.

„Hvort er það? Sömuleiðis eru hér stjórnarliðar sem hvað eftir annað birta myndbönd þar sem þeir auglýsa afslátt af pizzum, afslátt af pizzum ef við göngum í Evrópusambandið. Afslátt af pizzum hvorki meira né minna. Svo kemur hæstvirtur ráðherra og segir: Þetta er allt mjög mismunandi, það er bara allur gangur á öllu eftir því um hvaða land ræðir. En það er búið að lofa okkur hérna 25 prósent lækkun á matvælaverði ef við göngum inn.“

Þá spurði Guðlaugur ráðherrann út í atvinnuleysi.

„Er hæstvirtur ráðherra sammála Gylfa Zoega, fulltrúa Viðreisnar í Seðlabankanum, þar sem hann talar um að það sé eftirsóknarvert að fólk þurfi að flytja frá landinu til að sækja sér vinnu?“

Þorgerður sagði að þingið hefði breytt spurningunni yfir í að hefja samningaviðræður á ný.

„Mér finnst erfitt að heyra að háttvirtur þingmaður vilji ekki gefa ungu fólki kost á því þegar það er búið að taka ákvörðun um að kaupa íbúð, öðruvísi en að þurfa að borga hana þrisvar sinnum. Það er veruleikinn sem háttvirtur þingmaður vill,“ sagði Þorgerður Katrín Gunnarsdóttir, utanríkisráðherra.

„Svaraðu spurningunni,“ greip Guðlaugur Þór inn í. 

„Ég er að svara spurningunni, ég er búin að svara henni í fyrra svari og mér finnst miður að mín svör eru ekki alltaf eftir hentugleika fyrir háttvirta þingmenn, þannig er það.“

Frammíköll hófust á ný og þurfti forseti Alþingis að skerast í leikinn.

„Ég bið háttvirta þingmenn að halda ró sinni hér í þingsal,“ sagði Þórunn Sveinbjarnardóttir forseti þingsins.

Fréttin hefur verið uppfærð.