Byrjaði mótið með enga styrktar­aðila og á­hyggjur af hótelkostnaði

Chwalinska er í 114. sæti heimslistans og hefur komist alla leið úr undankeppninni í úrslitaleikinn. Þetta Öskubuskuævintýri virðist engan enda ætla að taka en Mirra Andreeva mun standa í vegi hennar þegar úrslitaleikurinn hefst á eftir.

Á leið sinni í úrslitaleikinn hefur Chwalinska safnað rúmlega 1,6 milljónum dollara í verðlaunafé, sem jafngildir tæplega 200 milljónum króna og er um tvöfalt meira en hún hafði þénað á öllum ferlinum fram að þessu móti.

Hennar helsta markmið var bara að komast inn á Opna franska en þegar sigrarnir héldu áfram að hrannast inn lenti hún í smá vandræðum. Verðlaunaféð fær hún nefnilega ekki fyrr en eftir mótið, þannig að þegar Chwalinska ílengdist í París hafði hún ekki efni á fleiri nóttum á hótelinu.

„Ég vona að það séu einhver herbergi laus… Og ég vona að ég geti fundið peninga fyrir því,“ sagði Chwalinska þá en þetta reddaðist allt saman.

Fyrirtækið Oshee bauðst til að greiða fyrir hana hótelkostnað og Chwalinska hefur fengið fleiri með sér í lið. Hún byrjaði mótið í ómerktri treyju en nú er treyjan skreytt merkjum fjögurra fyrirtækja.

Álagið er samt farið að taka á hana. Enginn leikmaður hefur spilað fleiri leiki á mótinu.

„Það er mjög erfitt að spila gegn bestu leikmönnum heims dag eftir dag, en ég meina þetta er risamót þannig að maður lætur sig hafa það. Ég ætla að gefa allt í þetta og meira en það. Ég er alls ekki að kvarta,“ sagði Chwalinska fyrir úrslitaleikinn.

Úrslitaleikur Opna franska meistaramótsins hefst klukkan 13:00 í beinni útsendingu á Eurosport stöðinni sem fylgir með sportáskrift að Sýn.