Óttaðist að komast ekki inn en leikur til úr­slita um helgina

Chwalinska hefur þurft að hafa mikið fyrir hlutunum en að meðtalinni undankeppninni hefur nú unnið níu leiki í röð á leirvöllum Rolland Garros. 

Samkvæmt Opta er hún lægst skrifaða konan síðan 1977 til að komast í úrslitaleik Opna franska. 

Chwalinska lagði Diana Shnaider að velli í undanúrslitum í dag, 7-6, 6-4. Í leiknum sýndi Chwalinska mikinn stöðugleika og náði nokkrum frábærum skotum en vörn lágvaxna Pólverjans var sérlega sterk.

Með sigrinum varð Chwalinska aðeins önnur kona sögunnar til að fara frá undankeppni og í úrslitaleik á risamóti. Emma Raducanu er sú eina sem hefur tekist það áður, á Opna bandaríska árið 2021.

Í úrslitaleiknum á laugardaginn mun Chwalinska mæta hinni rússnesku Mirra Andreeva, sem er aðeins nítján ára gömul og einnig á leiðinni í sinn fyrsta úrslitaleik á risamóti.

Þrátt fyrir að vera fimm árum yngri er Andreeva samt talin sigurstranglegri. Hún vann gullverðlaun í tvíliðaleik á Ólympíuleikunum í París 2024, sem samherji Diana Shnaider.

Andreeva hefur líka átt fast sæti á WTA mótaröðinni og komist í úrslitaleiki í Dubai, Madríd, Miami, á Ítalíu og á Indian Wells mótinu.

Chwalinska hefur ekki náð eins háum hæðum á sínum ferli og sagði fyrr á árinu að helsta markmið hennar árið 2026 væri að komast inn á Opna franska. Hún getur gert gott betur á laugardaginn.