Fjórir kylfingar fóru holu í höggi fyrstu vikuna í Leirdalnum

Ágúst Orri Arnarson skrifar 29. maí 2026 12:31

Lánið hefur leikið við kylfinga á Leirdalsvelli í upphafi sumars. Golfklúbbur Kópavogs og Garðabæjar

Golfsumarið er hafið og íþróttin á hámarki vinsælda sinna á Íslandi. Í upphafi sumars hafa kylfingar á Leirdalsvelli Kópavogs og Garðabæjar verið alveg einstaklega hittnir.

Leirdalsvöllur var opnaður í síðustu viku og fyrstu vikuna fóru fjórir kylfingar holu í höggi.

Annað eins er fáheyrt á svo skömmum tíma en Leirdalsvöllur er sagður „krefjandi fyrir golfara á öllum stigum íþróttarinnar.“

Völlurinn liggur frá Vetrarmýrinni í Garðabæ og upp í Leirdalinn í Kópavogi og aftur til baka.

Gunnar Valdimar Johnsen (yngri) var fyrstur í sumar til að fara holu í höggi, á 13. holu Leirdalsvallar þann 22. maí.

„Afi hans og nafni fer reglulega holu í höggi og hefur eflaust verið búinn að skóla juniorinn til hvernig ætti að ná þessu,“ segir í tilkynningu GKG.

Jóhannes Karl Bárðarson lék afrek Gunnars eftir síðastliðinn mánudag, 25. maí, þegar hann fór holu í höggi á 13. holu Leirdalsvallar.

Nei, fór hann ekki bara yfir?

Petrún Jónsdóttir fór svo 4. holuna í Leirdalnum í einu höggi degi síðar, þriðjudaginn 26. maí.

Petrún var að spila af bláum teigum og sýndi mælingin 120 metra.

"Ég sló með 8 járni beint á pinna boltinn lenti ca 3 metra frá rúllaði bein ofaní. Hilmar Sigurjónsson var að spila með mér og hann byrjar “hann fór ofaní, hann fór ofaní” og faðmar mig ég salla róleg nei, fór hann ekki bara yfir?

Ég sé ekkert sérlega vel frá mér, hann var ný búinn að gera grín af mér að ég horfði aldrei á eftir boltanum, ég var bara að ganga frá kylfunni þegar boltinn rúllaði ofaní," segir Petrún við GKG.

Allir í kollhnís Jóhanni til heiðurs

Jóhann Örn Sveinbjörnsson fór síðan holu í höggi á 11. holu í Leirdalnum í fyrradag, miðvikudaginn 27. maí.

„Hann var nýbúinn að vara meðspilara sinn á 9. holu að nota alvöru bolta ef draumahöggið kæmi, "væri leiðinlegt að ramma inn Kirkland bolta".

Að sögn meðspilara Jóhanns sló hann draumahöggið með Gap wedge, boltinn tók stefnuna beint á pinna og vitir menn eitt, tvö skopp og beint ofan í holu við mikin fögnuð viðstaddra.

Meðspilarar tóku einn góðan kollhnís til heiðurs Jóhanni!

Stórglæsilegt högg og í annað skiptið á golfferlinum sem Jóhann Örn fer holu í höggi,“ segir í tilkynningu GKG.