Úr fríi á Spáni til Ís­lands en endaði aftur á Spáni

Elvar gerir samning við félagið út yfirstandandi tímabil en liðið háir harða baráttu um sæti í úrslitakeppni spænsku deildarinnar um þessar mundir. Hann kemur til liðsins frá Anwil Wloclawek í Póllandi en spænska liðið á aðeins tvo leiki eftir í deildarkeppninni. Með liðinu spila þaulreyndir NBA leikmenn á borð við Patty Mills og Marcelo Huertas.

„Við fórum í smá frí fjölskyldan til Malaga eftir tímabilið og svo varð ég að fljúga til Póllands og sækja töskurnar og fékk hringingu frá umboðsmanninum um að Tenerife væri með tilboð á borðinu og hvort ég væri til í að stökkva á það og horfði á konuna mína og spurði hvort ég ætti að taka þessu og hún bara: „ekki spurning.“ Þannig að þetta var ákveðið á einhverjum þrem, fjórum mínútum,“ segir Elvar Már í Sportpakkanum á Sýn í gær.

Í landinu í sex klukkustundir

„Svo hoppuðum við í næsta flug til Íslands og ég var þar í sex klukkutíma, svo fór ég til baka til Spánar.“

Ína María Einarsdóttir er kona Elvars og eiga þau von á barni í júlí. Hún fer því ekki með honum til Tenerife og verður eftir á Íslandi.

„Hún er bara heima, þannig ég ákvað að taka þetta. Strákurinn minn er að klára skólaárið og svona heima, þannig að ég tek þetta verkefni á mig.“

Tenerife ætlar sér í úrslitakeppnina í ACB-deildinni.

„Það eru tveir leikir eftir og ég held að einn sigur dugi til að komast í úrslitakeppni. Leikstjórnandinn þeirra meiðist og er frá í einhverja daga og þeir þurftu bara mann í hvelli, þannig að ég ákvað að stökkva á það. Þeir voru búnir að heyra í mér áður í vetur, í febrúar, og sendu þeir mér tilboð og ég reyndi að komast en liðið mitt í Póllandi hleypti mér ekki, þannig að það var gaman að geta fengið aftur tækifæri á þessu, þannig að ég gat ekki sagt nei við því. Þetta er risaklúbbur og að koma hérna og sjá aðstæðurnar og svona bara batteríið í kringum þetta þá sér maður að þetta er risastórt batterí, ég svona áttaði mig ekki alveg á því.“