Mikil leynd ríkir yfir smá­at­riðunum

Hildur Björnsdóttir, oddviti Sjálfstæðisflokksins í Reykjavík, boðaði hina tíu kjörnu borgarfulltrúa og varaborgarfulltrúa flokksins á fund í félagsheimili Snarfara við Naustavog. Fundurinn stóð í um tvær klukkustundir. 

Enginn fulltrúanna sem fréttastofa hefur náð í hefur viljað ræða hvað kom nákvæmlega fram á fundinum og ríkir mikil leynd yfir smáatriðunum. Þó liggur fyrir að enginn annar fundur hefur verið boðaður á næstunni og treysta fulltrúarnir Hildi fyrir því að leiða meirihlutaviðræðurnar.

Að fundinum loknum komu fulltrúarnir sér saman og tóku eina sjálfu sem Bjarni Guðjónsson, einn þeirra, birti á Facebook.

Á fundinum var staða mála í fyrirhuguðum meirihlutaviðræðum rædd en fyrir liggur að Hildur íhugar meirihlutasamstarf með annað hvort Miðflokknum eða Framsókn og Viðreisn. Funduðu oddvitar flokkanna fjögurra í hádeginu í gær.