Icelandair tapaði 5,6 milljörðum króna

Þrátt fyrir þetta hafa tekjur félagsins aldrei verið meiri, að sögn stjórnenda. Jukust þær um 21 prósent milli ára og voru 42,9 milljarðar króna á fyrstu þremur mánuðum ársins. Þetta kemur fram í tilkynningu frá félaginu.

Samhliða þessu voru auknar tekjur af hverjum seldan sætiskílómetra og metsætanýting. Skilaði þetta tvennt 7 prósent hækkun á einingatekjum Icelandair á tímabilinu. 

Rekstrarafkoma batnaði og var EBIT tap (afkoma án vaxta- og skattagreiðslna) 6,6 milljarðar króna, sem er bæting um 1,1 milljarð króna milli ára. EBIT hlutfall batnaði sömuleiðis og fór úr því að vera neikvætt um 21,7 prósent á síðasta ári í neikvætt um 15,4 prósent á fyrsta ársfjórðungi nú.

Síðri framlegð af tengiflugi yfir hafið

Bogi Nils Bogason forstjóri segir að fjárhagsstaða félagsins sé sterk og lausafjárstaðan hafi hækkað um 107 milljónir bandaríkjadali miðað við sama tíma í fyrra „sem gerir okkur vel í stakk búin til að takast á við þær áskoranir sem framundan eru, ásamt áframhaldandi áherslu á kostnaðaraðhald og hagræðingu í rekstri.“ Þetta er haft eftir honum í tilkynningu til Kauphallar. 

Hann segir að tekjumetið endurspegli áherslu á markaðina til og frá Íslandi sem skili betri framlegð við núverandi markaðsaðstæður en tengiflug yfir Atlantshafið.  

„Tekjur af fraktstarfsemi jukust einnig á milli ára og afkoma af leiguflugi var góð í fjórðungnum. Gengisáhrif og launahækkanir höfðu neikvæð áhrif á kostnaðarþróun en við héldum áfram að leggja áherslu á stundvísi og hagræðingu í rekstri.“

Áhrif olíuverðs meira áberandi á komandi mánuðum

Bogi segir að snörp hækkun olíuverðs hafi ekki haft teljandi áhrif á afkomu félagsins í ársfjórðungnum en meiri áhrifa þessara hækkana sé að vænta frá og með öðrum ársfjórðungi. 

„Til að bregðast við þessari stöðu höfum við dregið flugframboð saman um rúmlega 2% frá miðjum apríl til loka júní. Þá eru hækkanir á farmiðaverði óhjákvæmilegar og fargjöld hafa verið hækkuð frá því að þessi þróun eldsneytisverðs hófst. Þetta hefur þó ekki haft mælanleg áhrif á eftirspurn eins og staðan er í dag,“ fullyrðir Bogi í tilkynningu.

Fréttin hefur verið uppfærð.