Hagnaður jókst um 21 prósent á fyrsta árs­fjórðungi

Þetta kemur fram í tilkynningu um uppgjör Emblu Medical, áður Össurar, á fyrsta ársfjórðungi ársins.

Þar kemur einnig fram að innri vöxtur í sölu á stoðtækjum nam níu prósentum á fjórðungnum, vöxtur í spelkum og stuðningsvörum var eitt prósent og tekjur af þjónustu við sjúklinga drógust saman um eitt prósent.

„Sala á fyrsta ársfjórðungi var sterk og nam 232 milljónum Bandaríkjadala. Heildarvöxtur nam 15%, þar af var innri vöxtur 4%. Vöxtur á fjórðungnum var að mestu drifinn áfram af sterkri sölu stoðtækja, studdur af áframhaldandi jákvæðri þróun þvert á markaði og vöruflokka. Vöxtur í spelkum og stuðningsvörum var hóflegur, á meðan tekjur af þjónustu við sjúklinga voru hægari á ársfjórðungnum, sem við gerum þó ráð fyrir að taki við sér síðar á árinu,“ segir Sveinn Sölvason forstjóri í tilkynningunni.

Hann segir að það megi sjá jákvæða þróun í þjónustu við skjólstæðinga í Bandaríkjunum og framkvæmd stefnumótandi verkefna gangi vel.

„Framangreint styður við áframhaldandi vöxt í þjónustu okkar í alþjóðlegu samhengi á komandi fjórðungum og gerir okkur kleift að ná til fleiri sem þurfa á vörum okkar að halda. Einnig var ánægjulegt að sjá hagnað félagsins aukast um 21% á fjórðungnum. Í ljósi þessa er fjárhagsáætlun félagsins fyrir árið 2026 óbreytt, með væntanlegum innri vexti í sölu á bilinu 5–8% og EBITDA-framlegð á bilinu 20–22%,“ segir hann að lokum.

Í tilkynningu kemur einnig fram að rekstrarhagnaður fyrir afskriftir (EBITDA) nam 40 milljónum Bandaríkjadala (5 milljörðum íslenskra króna) sem jafngildir 17 prósenta EBITDA-framlegð á fjórðungnum, samanborið við 18 prósent á fyrsta ársfjórðungi 2025. EBITDA-framlegð lækkaði í fjórðungnum aðallega vegna neikvæðra gengisáhrifa og tolla.

Hagnaður á fyrsta ársfjórðungi jókst um 21 prósent og nam 15 milljónum Bandaríkjadala (2 milljörðum íslenskra króna), sem samsvarar sex prósentum af veltu. Fjárhagsáætlun ársins 2026 er óbreytt, 5-8 prósenta innri vöxtur og 20-22 prósenta EBITDA-framlegð að teknu tilliti til einskiptisliða.

Á fjórðungnum voru samkvæmt tilkynningu keypt 556.103 eigin bréf fyrir samtals 2,6 milljónir Bandaríkjadala (0,3 milljarða íslenskra króna).