Nýtt afl virkjað í Elliðaárstöð

Orkuveitan gerir þennan heim sýnilegan í Elliðaárstöð. Þar sem áður var iðnaðarsvæði er nú lifandi almenningsrými þar sem leikur, fræðsla og menning mætast í hjarta Elliðaárdals.

Gamlar og fallegar byggingar hafa fengið nýtt hlutverk og segja sögu þeirra kerfa sem við sjáum sjaldan. Á stað þar sem vatnsaflið var virkjað er nú lögð áhersla á að vekja forvitni um orkuna og virkja hugvit gesta. Þar er boðið upp á vísindamiðlun um orku og veitukerfin, ásamt fjölbreyttum viðburðum og mannlífi sem tengir fólk við það sem liggur undir yfirborðinu.

Fjölskyldugleði í dalnum

Ósýnilegt verður sýnilegt í Elliðaárstöð

Elliðaárstöð markaði á sínum tíma upphaf rafvæðingar í Reykjavík og færði íbúum borgarinnar mikil lífsgæði. Eftir að rafmagnið fór að streyma frá helstu vatnsaflsvirkjunum, gátu Reykvíkingar lokað hlóðaeldhúsum, reykmettuðum og heilsuspillandi kytrum, og eldað matinn á rafhellu við rafljós.

Í dag getum við vart ímyndað okkur daglegt líf án þess að til okkar streymi hreint drykkjarvatn, varmi, rafmagn og gagnamagn. Við værum fæst til í að búa í húsi án fráveitu. Veitukerfin sem færa okkur þessi lífsgæði eru mikið til ósýnileg og við tökum þeim sem sjálfsögðum. Við sjáum þau ekki nema þegar eitthvað klikkar.

Við hugsum sjaldan um hvaðan vatnið kemur, eða hvað þarf til að kveikja ljós og gleymum því að það þarf að vernda vatnið, að það þarf að nota orkuna skynsamlega og að það þarf stöðugt að viðhalda þessum stóru mikilvægu kerfum.

„Í Elliðaárstöð fræðum við gesti um þessi mál með því að fjalla um orku, vísindi og auðlindir í gegnum leiki og sögur. Með skemmtilegum hætti fjöllum við um hvaðan orkan kemur, hvernig við notum hana og hvernig við getum tekið betri ákvarðanir um orku í framtíðinni.

„Við viljum líka að fleiri krakkar velji sér framtíð í iðn- og tæknigreinum og í orkugeiranum og bjóðum upp á fræðslu fyrir nemendur á öllum skólastigum. Við erum í samstarfi við nokkra skóla og frábæra kennara og styðjum við STEAM menntun í skólum. Svo erum við líka með frábært samfélag skólavina, en við miðlum með þeim áhugaverðu efni um orkulæsi, STEAM og auglýsum fræðsluna okkar,“ segir Margrét Hugadóttir, leiðtogi vísindamiðlunar.

Áfangastaður vísinda, orku og náttúru

Elliðaárstöð er í raun stór inni- og útisýning þar sem fróðleiksmolar um orku og veituinnviði eru sýnilegir um allt svæðið.

• Sýningin Heimili veitna sýnir hvernig veitukerfin tengjast heimilinu.
• Sýningin Hjartastrengir & vatnsæðar í Gestastofunni sýnir hvernig mikilvæg veitukerfi borgarinnar gegna svipuðu hlutverki og lífsnauðsynleg líffærakerfi mannslíkamans.

Á stað sem vatnsaflið var áður virkjað, virkjum við nú sköpunarkraftinn, forvitni og hugvit gesta.

Veitukerfin tengja fólkið í samfélaginu

Elliðaárstöð segir sögu veitukerfa og menningar í borginni með áherslu á nýsköpun og frumkvöðlastarf. Með þetta að leiðarljósi er Elliðaárstöð í samstarfi við listafólk, félagasamtök, útivistarfólk og fleiri skapandi hópa sem hafa tengst svæðinu í sínum verkefnum. Má þar nefna Sirkuslistafélagið Hringleik sem þróaði sirkussýninguna Megawhat! og vísindasmiðju í samstarfi við vísindafólk Orkuveitunnar. Einnig eru Hugmyndasmiðir með skemmtilegt verkstæði fyrir skapandi fólk og bjóða sumarnámskeið í nýsköpun fyrir börn. Elliðaárstöð tekur þátt í stórum menningarhátíðum, líkt og Barnamenningarhátíð, Hönnunarmars og Listahátíð, og býður upp á fjölbreytta dagskrá fyrir fjölskyldur og gesti dalsins.

Elliðaárstöð er í alfaraleið hjólafólks og hafa Auðlindahringir Orkuveitunnar slegið í gegn hjá hjólreiðafólki. Auðlindasérfræðingar hjá Orkuveitunni og Veitum, sem þekkja veitukerfin inn og út, leiða hjólaleiðsögn um auðlindir og innviði höfuðborgarsvæðisins í sumar.

Þetta snýst um að tengja saman fólk og efla samfélagið.

Busl og lautarferð í hjarta borgarinnar

„Fólk hefur tekið Elliðaárstöð virkilega vel og hafa um 205.000 gestir heimsótt svæðið frá árinu 2021 þegar uppbygging á svæðinu hófst. Með hækkandi sól fjölgar gestum dalsins og hópast fólk hingað í lautarferðir og busl í Vatnsleikjagarðinum á góðviðrisdögum. Kaffihúsið Elliði er rekið yfir vor og sumarmánuði og hafa margir haft það á orði að það sé eins og að vera í útlöndum að koma hingað. Við hlökkum til að sjá svæðið blómstra og fyllast af lífi í sumar,“ segir Elísabet.

• Sumaropnunartími Elliðaárstöðvar er frá 23. apríl til 30. september
• Gestastofa Elliðaárstöðvar er opin alla miðvikudaga til sunnudaga frá 13:00–16:00
• Kaffihúsið Elliði opnar dyr sínar alla þriðjudaga til sunnudaga frá 11:00–17:00