ÍA svarar: Allar frá­sagnir hafa fleiri en eina hlið

Andri greindi frá starfslokum sínum hjá ÍA í pistli á Facebook í gærkvöldi. Þar sagðist hann hafa gert mistök á æfingu yngri flokka og í framhaldinu hafi formaður Barna- og unglingaráðs ÍA viljað reka hann úr klúbbnum.

Andri var alls ekki sáttur með sín starfslok og sagði fullt af fólki hafa verið á sinni hlið en „einhverjir sem sitja á skrifstofu og hafa aldrei sparkað í bolta“ hafi viljað hann burt.

„Knattspyrnufélag ÍA vill árétta að allar frásagnir hafi fleiri en eina hlið. Félagið starfar almennt í samræmi við siðareglur og hegðunarviðmið Íþróttabandalags Akraness og Íþrótta- og Ólympíusambands Íslands. Knattspyrnufélag ÍA lítur svo á að málinu sé lokið og mun félagið ekki tjá sig frekar um það,“ segir Eggert Herbertsson, formaður knattspyrnufélagsins ÍA.

Samkvæmt heimildum fréttastofu tengist brottreksturinn því hvernig Andri tók á slagsmálum iðkenda á æfingu hjá fimmta flokki ÍA. Var honum gert að segja upp ella yrði málið tilkynnt til barnaverndar.