Díana fer aftur til Fram

Díana verður aðstoðarþjálfari meistaraflokks kvenna hjá Fram auk þess sem hún mun þjálfa U-lið félagsins og þriðja flokk kvenna í handbolta.

„Díana kemur til starfa með víðtæka reynslu úr íslenskum handbolta, bæði sem leikmaður og þjálfari. Hún spilaði allan sinn yngri flokka feril með Fram og á að baki farsælan meistaraflokksferil hjá félaginu. Á undanförnum árum hefur hún jafnframt byggt upp sterkan orðstír sem þjálfari með skýra sýn og mikla ástríðu fyrir íþróttinni.

Handbolti og Fram eru Díönu og hennar fjölskyldu nátengd. Faðir hennar, Guðjón Jónsson, þjálfaði Fram um árabil og systur hennar, Guðríður Guðjónsdóttir og Hafdís Guðjónsdóttir, léku og þjálfuðu einnig hjá félaginu í gegnum tíðina,“ segir í tilkynningu Fram.

„Við erum afar ánægð með að fá Díönu til liðs við okkur. Hún býr yfir mikilli þekkingu á leiknum, sterkri leiðtogahæfni og hefur sýnt fram á getu til að þróa leikmenn og lið,“ segir Gísli Freyr Valdórsson, formaður Handknattleiksdeildar Fram.