Vignir Vatnar einn á toppnum

Alls hafa sex umferðir verið tefldar í mótinu af ellefu alls og er Vignir Vatnar eini keppandinn sem hefur önglað saman 5,5 vinningum af 6 mögulegum. Það er ótrúlegur árangur, ekki síst í ljósi þess að íslenski stórmeistarinn ungi var 74. í styrkleikaröð mótsins þegar það hófst.

Í sjöttu umferð sem fram fór fyrr í dag lagði Vignir Vatnar ítalska stórmeistarann Lorenzo Lodici með svörtu mönnunum eftir harða baráttu. Í nýbirtri frétt á skak.is er farið yfir skákina glæsilegu í ítarlegu máli.

Í umferðinni á undan hafði Vignir svo lagt serbneska stórmeistarann Aleksandar Indjic að velli sem þóttu talsverð tíðindi á mótsstað enda Indjic í hópi sterkustu skákmanna heims og landaði sjálfum Evrópumeistaratitlinum árið 2024 með fáheyrðum yfirburðum.

Að neðan má sjá viðtal við Vigni Vatna ytra eftir þann sigur sem vakti mikla athygli.

„Það er náttúrulega bara frábær tilfinning þegar vel gengur og mikilvægt að njóta þess í botn. En að sama skapi þá er mikið eftir af mótinu og mikilvægt að halda sér á jörðinni,“ segir Vignir Vatnar í samtali við Vísi.

Hann var þá á leiðinni í líkamsrækt hótelsins sem hann dvelur á sem hann segir að sé ófrávíkjanleg skylda eftir hverja skák. Þaðan verður förinni heitið í saunu hótelsins ásamt reynsluboltanum og stórmeistaranum Hannesi Hlífari Stefánssyni sem einnig tekur þátt í mótinu og er ofarlega með fjóra vinninga af sex mögulegum.

„Við förum yfir stöðuna þar. Hannes Hlífar hefur upplifað allt sem hægt er að upplifa í skákinni og lumar eflaust á einhverjum ráðum,“ segir Vignir fullur tilhlökkunar fyrir næstum dögum.

Á morgun bíður hans erfitt verkefni en það er viðureign gegn sterkasta stórmeistara Spánar, David Anton Guijarro, sem er næst stigahæsti skákmaður mótsins.

Skákin hefst klukkan 13.00 á morgun og verður hægt að fylgjast með henni í beinni útsendingu á Youtube-síðu Evrópumótsins sem og í gegnum skak.is.