„Svona Van der Sar í úr­slita­leiknum í Meistara­deildinni 2008“

Á 72. mínútu í leik ÍBV og FH á Hásteinsvelli fengu gestirnir úr Hafnarfirði vítaspyrnu. Staðan var þá 1-0, heimamönnum í vil.

Kjartan Kári Halldórsson fór á punktinn. Áður en hann tók spyrnuna benti Zapytowski tvisvar til hægri frá sér séð.

Kjartan Kári skaut þangað sem Zapytowski benti. Markvörðurinn skutlaði sér líka í það horn og varði spyrnuna.

„Þetta er svona [Edwin] Van der Sar í úrslitaleiknum í Meistaradeildinni 2008, þegar hann varði frá [Nicolas] Anelka,“ sagði Baldur Sigurðsson í Stúkunni í gær.

„Hann næstum grípur þetta. Þetta er föst spyrna og hún fer langleiðina út í hornið en hún er í rosalega þægilegri hæð fyrir markvörðinn,“ sagði Bjarni Guðjónsson.

Átta mínútum eftir vítavörslu Zapytowskis jafnaði Kári Kristjánsson fyrir FH með sínu fyrsta marki í efstu deild.

Zapytowski lék vel með ÍBV í fyrra þegar liðið endaði í 9. sæti Bestu deildarinnar sem nýliði. Síðasta haust samdi Zapytowski við ÍBV til tveggja ára.

Viggó Valgeirsson skoraði mark Eyjamanna í leiknum í gær þegar tíu mínútur voru til hálfleiks. Aleksandar Linta stýrði ÍBV í fyrsta sinn í deildarleik í gær.

Næsti leikur ÍBV er gegn Val á Hlíðarenda á föstudaginn.