Sakaði Luke Littler um dóna­skap

Walesverjinn Price var í stórkostlegu formi allt kvöldið, með 105,84 að meðaltali þegar hann sigraði Van Veen 6-2 í úrslitaleiknum og færði sig upp í annað sæti úrvalsdeildartöflunnar með sínu öðru sigurkvöldi á tímabilinu.

Helsta umræðuefnið kom í lok spennandi 6-5 sigurleiks Van Veen á móti Littler í átta manna úrslitum.

Hollendingurinn sýndi merki um vonbrigði eftir að hafa misst af tvöföldum fimmtán til að vinna leikinn og sá Littler á sama tíma fagna klúðri sínu. Það leiddi til reiðilegra viðbragða frá heimsmeistaranum, sem benti Hollendingnum á að halda áfram.

Littler missti síðan af tveimur öðrum pílum til að vinna leikinn og gerði síðan „væluskjóðu“-bendingu til áhorfenda.

Van Veen hélt þó ró sinni og hitti tvöfaldan sex til að vinna leikinn. Stutt handaband fylgdi í kjölfarið áður en Littler gekk í burtu.

„Frá mínum bæjardyrum séð, þá missti ég af tvöföldum fimmtán og var brjálaður út í sjálfan mig fyrir að klúðra því og ég leit við og hann var að fagna því að ég klikkaði,“ sagði Van Veen við Sky Sports.

„Það var dónaskapur. Ég var brjálaður yfir því,“ sagði Van Veen.

„Hann sá það líklega og missti svo af þremur pílum í tvöfaldan sjö og horfði svo á mig eins og ég væri vandamálið og ég hugsaði með mér: ‚Ég veit ekki hvað ég gerði rangt því þú ert að fagna því að ég klikkaði‘.“

„Mér fannst það dónaskapur. Hann klikkaði og svo kláraði ég og hann er líklega brjálaður. Þetta er pílukast og þetta er mitt sjónarhorn. Hans sjónarhorn er líklega öðruvísi, en svona er þetta,“ sagði Van Veen.

„Ég dýrka Luke. Hann er frábær leikmaður og frábær fyrir íþróttina. Að sjá alla þá athygli sem hann hefur vakið á henni er stórkostlegt en þetta er líka hluti af þessu og í dag var minn dagur,“ sagði Van Veen.

Littler svaraði ummælum Van Veen með hlæjandi brosköllum á Instagram-sögu sinni og birti einnig mynd sem sýndi PDC-titlana sem hann hefur unnið á síðustu tveimur árum.

Littler var að keppa á heimavelli og því voru það risastór vonbrigði fyrir hann að komast ekki lengra en í átta manna úrslitin.