Innviðagjald og hækkun vasks eyði­leggi sam­keppnis­hæfni ferða­þjónustunnar

Fram kom í fjármálaáætlun ríkisstjórnarinnar sem kynnt var í gær að til stæði að hækka virðisaukaskatt á baðlón úr 11 prósentum í 24 prósent. Jóhannes Þór Skúlason framkvæmdastjóri Samtaka ferðaþjónustunnar sagði tilætlaða hækkun á virðisaukaskatti rauða línu en erfitt er að segja til um hver möguleg áhrif hækkunarinnar ofan í áhrif innviðagjaldsins verði.

„Það er ekki gefið að ferðaþjónustan geti tekið allar skattahækkanir sem mönnum dettur í hug. Þarna verður ríkisstjórnin einfaldlega að velja hvort hún vilji hafa heildstæða gjaldtöku, náttúru- og innviðagjald, eins og kynnt var í stjórnarsáttmálanum, eða ætlar hún að eyðileggja samkeppnishæfni greinarinnar og rekstrarforsendur fyrirtækjanna enn frekar,“ sagði Jóhannes Þór í kvöldfréttum Sýnar.

Hann segir Samtök ferðaþjónustunnar ekki hafa heyrt neinar ákveðnar upphæðir nefndar en að ýmsir hafi nefnt að sársaukamörkin séu í kringum fimm þúsund krónur. Það byggi þó ekki á neinum mælingum.

„Þannig að við rennum blint í sjóinn með upphæðir og útfærslur,“ sagði Jóhannes.

Þegar saman kemur innviðagjaldið og hækkað gjald á baðlónin, er þetta þess eðlis að þetta muni skaða greinina mikið?

„Tvímælalaust.“